Pavlodarlyq kópbalaly ana energetıktermen sottasyp, jeńip shyqty
PAVLODAR. QazAqparat - Pavlodarda sot «Pavlodar elektrjelisin taratý kompanııasy» AQ-nyń kópbalaly anany elektr qýatyn paıdalanǵany úshin energetıkterge mıllıon teńge qaryz bolǵany týraly aktisin jaramsyz dep tanydy.
«Sot Manan Ulardyń elektr energııasyn esepteý júıesine qatysty qýynymy boıynsha 2018 jyly 12 shildede sheshim shyǵardy. Qýynymdyq talaptar jartylaı qanaǵattandyryldy. 2017 jylǵy 7 jeltoqsandaǵy akti jaramsyz dep tanylyp, qýynymnyń qalǵan bóligine qatysty talaptar oryndalmady», - deıdi Pavlodar qalalyq sotynyń sýdıasy Baqyt Sátıeva.
Energetıkterdiń Pavlodar oblysy Qyzyljar aýylynyń 53 jastaǵy turǵyny U. Mananǵa jaryqty paıdalanǵany úshin salynǵan mıllıon teńge kólemindegi qaryzdy talap etý jónindegi aktisi jaramsyz dep tanyldy. Sebebi «PETK» AQ tilge qatysty zańda úlken qatelikter jibergen. Akti memlekettik tilge aýdarylmaǵan, al Ular Manan - oralman jáne orys tilin bilmeıtin bolyp shyqty.
Jeltoqsan aıynda esepteý aspabyn tekserý barysy túsirilgen beınetaspadan «PETK» AQ ókilderi tek bir rozetkany qarap shyqqany belgili boldy. Negizinde tekseris túgeldeı júrgizilýi kerek bolǵan. Páterdi tolyǵymen tekserip shyqqanyn rastaıtyn qural joq. Sot sheshim shyǵarmas buryn atalmysh másele boıynsha eki aı boıy elektrtehnıkalyq saraptama júrgizilgen.
U. Manannyń aıtýynsha, ol qujattyń ishinde ne jazylǵanyn bilmeı, qol qoıǵan. Áıel adamǵa tek rozetkalar men eseptegish quraldardyń tekseristen ótkenin, ony rastaıtyn aktige qol qoıý kerektigin aıtqan. Keıin belgili bolǵandaı, U. Manannyń tabylǵan aqaýlardy rastaıtyn qujattarǵa qol qoıǵany anyqtaldy. 7 jeltoqsan kúni áıel adamnyń úıindegi jaryqty sóndirip tastaǵan. Aýyl ákiminiń ótinishinen keıin biraz ýaqytqa qosyp, qaıtadan óshirgen.
Sot ázirge áıeldiń úıine elektr qýatyn qosýǵa tyıym saldy. Sottyń sheshimi kúshine engennen keıin bir aıdan soń ǵana ruqsat etiledi.
