Pavlodarlyq kolonııanyń eks-basshysy tórt jylǵa bas bostandyǵynan aıyryldy
PAVLODAR. QazAqparat - Pavlodarda dzıýdo boıynsha el chempıony Baýyrjan Ábdikárimovti azaptap, ózine-ózi qol jumsaýǵa ıtermeledi degen aıyp taǵylǵan túzetý mekemesiniń úsh qyzmetkerine qatysty úkim shyǵaryldy, dep habarlaıdy pavlodarnews.kz .
Pavlodar qalasynyń qylmystyq ister jónindegi № 2 soty úsh sottalýshyny da kináli dep tapty. Degenmen kolonııanyń burynǵy basshysy Ernur Saspanovtyń ǵana múlki tárkilenip, tórt jylǵa bas bostandyǵynan jáne memlekettik qyzmette, quqyq qorǵaý organdarynda qyzmet etý quqyǵynan aıyryldy. Ol ortasha qaýipsizdik túzetý mekemesinde, ıaǵnı jalpyǵa ortaq kolonııada jazasyn óteıtin bolady. Rejimdi bólimniń burynǵy basshysy Erjan Kankın jáne jedel ýákil Qaıyrbaı Muqanovqa úsh jylǵa shartty merzim berildi jáne úsh jyl belgili bir qyzmette laýazymǵa ıe bolýǵa tyıym salyndy.
- Ernur Saspanovqa qyzmettik ókilettigin teris paıdalaný aıyby taǵyldy, - dedi memlekettik aıyptaýshy Elena Belova. «Sottalýshy ózin jaraqattaǵan kezde túzetý mekemesiniń basshysy sheshim qabyldamaǵan, kerisinshe, ony aıyppul oqshaýlaǵyshyna ornalastyrmaý týraly úkim bergen. Ári qaraı Ábdikárimov azaptaýǵa ushyraǵan. Nátıjesinde psıhologııalyq turǵydan shydaı almaǵan soń, 2016 jyly 24 aqpanda ózine-ózi qol jumsaǵan». Saspanovty ótken jyly 18 aqpanda basshy qyzmetine taǵaıyndaǵan sátten bastap, 26 aqpanda ózine-ózi qol jumsaý oqıǵasy oryn alǵanǵa deıin sottalýshy basshy retinde birneshe kún ǵana jumys istegen. Rejimdik bólimniń basshysy Kankın men jedel ýákil Muqanovqa qyzmettik ókilettigin teris paıdalaný, azaptaý jáne ózine-ózi qol jumsaýǵa ıtermeleý jóninde aıyp taǵyldy. Memlekettik aıyptaýshy tarap sotty barlyq úsh sottalýshyny kináli dep taýyp, tórt jylǵa bas bostandyǵynan aıyrýǵa baǵdarlady. Degenmen sot sottalýshylardyń bireýine ǵana naqty merzimge úkim shyǵaryp, qalǵandary shartty túrde jaza aldy. Sot burynǵy úsh qyzmetkerge de qaıtys bolǵan adamnyń tórt týysynyń árqaısysyna 750 myń teńge moraldyq shyǵyn tóleýdi mindettedi.
