Pavlodarlyq kelinshektiń qyzy anasynan ajyramaı qatty jylady - Balıeva
ASTANA. QazAqparat - Astanadaǵy Oqýshylar saraıynda bastalǵan balalardy asyrap alýshy ata-analar men tálimgerler forýmy aıasynda jýrnalısterge suxbat bergen Balalardyń quqyqtaryn qorǵaý jónindegi ýákil Zaǵıpa Balıeva óziniń kishkentaı qyzyn soqqyǵa jyǵyp, balaǵattaǵan pavlodarlyq kelinshektiń ondaı áreketke ne úshin barǵanyn jan-jaqty zerdeleý kerek dep sanaıdy. Ol atalǵan otbasynyń bir kelisimge kelip, sheshesin analyq quqyǵynan aıyrmaıtynyna senedi, dep xabarlaıdy QazAqparat tilshisi.
"Iá, biz vıdeony kórdik. Shyny kerek, barsha qazaqstandyqtar eleń etti. Ókinishke oraı, ondaı otbasylar áli bar. Endi, vıdeo jarııalanǵannan keıin bárimiz ol týraly bildik. Biz ne istedik? Birden Pavlodarǵa zvondadyq. Sóıtse, ol jaqtaǵy mamandar tıisti sharalardy qolǵa alǵan eken. Bárin durys istedi. Olar aldymen sol úıge baryp, balany alyp qoıyp, balalar úıine aparyp tastady. Sebebi anasynyń áreketine baǵa berý kerek. Oǵan qosa, balanyń qaýipsizdigi máselesi taǵy bar. Bilýimshe, balany alyp keterde ol anasynan ajyramaı, qatty jylady. Qazir bala kóńildi, qarny toq. Ákesi men ájesine tapsyryldy. Onyń aldynda bir-eki kúndeı balalar úıinde boldy", - deıdi Z.Balıeva.
Onyń sózine qaraǵanda, qazirgi kezde tergeý amaldary júrip jatyr. Odan keıin sot bolady. Sol jerde bári sheshiledi. Balalardyń quqyqtaryn qorǵaý jónindegi ýákildiń atalǵan protsedýralarǵa qatysýǵa quqyǵy joq. Alaıda ol pavlodarlyq kelinshekti ana quqyǵynan aıyrmaıdy dep senedi.
"Menińshe, bárin anyq qaraý qajet. Sebebi sheshesin quqyǵynan aıyrý ońaı. Biraq ondaı minez qaıdan shyqty? Ol qylyqtarǵa ne sebep boldy? Osyny jan-jaqty zerdeleý kerek. Múmkin, kishkene ýaqyt berip, ákesi men ájesi otyryp, bir kelisimge keledi. Eń bastysy, balaǵa zııan tımese boldy. Kim biledi, ananyń qandaı jaǵdaıǵa urynǵanyn",-dep atap kórsetti xalyq qalaýlysy.
Eske salsaq, pavlodarlyq áıel óziniń úsh jasar qyzyn soqqynyń astyna alyp, ony vıdeoǵa túsirip alǵan. Keıin beınetúsirilimdi Іnstagram áleýmettik jelisinde jarııalady. Quqyq qorǵaý organdary, Pavlodar oblysynyń bilim basqarmasy oqıǵaǵa birden áreket etip, baldyrǵandy balalar úıine alyp ketken.
Keıin anyqtalǵandaı, 32 jastaǵy áıeldiń eki qyzy bar. Úlkeni 2-synypta oqıdy. Áke-sheshesiniń nekesi tirkelmegen. Biraq otbasy balalarǵa barlyq qajetti jaǵdaımen abattandyrylǵan úsh bólmeli páterde turady.
Keshe, 28 qazan kúni ákesi qyzyn jetimder úıinen alyp ketti. Birinshi nekeden týǵan úlken qyzy naǵashy ájesiniń qolynda.
«Qamqorlyq keńesi ákesi qyzyn alyp ketý úshin oń sheshim shyǵardy. Ádette komıssııa turǵyn úı aktisin, ýchaskelik qyzmetkerdiń minezdemesin, jumys ornynan anyqtama, basqa da qujattardy qaraıdy. Іs ata-ana quqyǵynan aıyrý nemese shekteý sheshimin shyǵarý úshin sotqa berildi», - dedi oblystyq bilim basqarmasy basshysynyń orynbasary E. Dáýrenov.
Al qyzdyń anasy balasyn aıaýsyz urǵany úshin keshirim suraǵan taǵy bir vıdeo jazǵan kórinedi.
