Pavlodarlyq qardan uzyndyǵy 7 metr jolbarys jasady
PAVLODAR. QazAqparat - AP-162/3 mekemesinde 2022 jyldyń birinshi kúni sottalǵandar arasynda «Eń kreatıvti muz músinshisi» konkýrsy ótti, dep habarlaıdy Ravlodarnews.kz.
Pavlodar oblysy boıynsha QAJD baspasóz qyzmetiniń málimetinshe, toǵyz jasaqtyń sottalǵandary qar men muzdan 14 músin jasaǵan. Áýesqoı sheberler qardan jolbarystar, arystandar, dınozavrlar jáne basqa da týyndylardy jasady. Onyń ishinde bıylǵy jyldyń sımvoly uzyndyǵy jeti metrlik jolbarys erekshe kózge túsedi.
Birinshi jasaq bastyǵy ádilet maıory Arman Júsipovtiń aıtýynsha, sottalǵandar baıqaýǵa qystyń alǵashqy kúnderinen bastap daıyndala bastaǵan.
«Sottalǵandar jasaqpen birlesip, qandaı shyǵarmashylyq ıdeıalardy iske asyratynyn, músinderdiń ornalasýyn talqylady. Shyǵarmashylyq jumysty bastaý úshin aıazdyń bolýyn kútti. Bıyl qystyń basy jyly boldy, qar da kóp túspedi, biraq soǵan qaramastan jańa jyldyń alǵashqy kúninde baıqaý ótti. Muz ben qardy qoldanyp, óz ónerin kórsetý árkimniń qolynan kele bermeıdi. Munda qııal, ónerdegi daǵdylar, shyǵarmashylyq qajet. Baıqaý barysynda jasaqtar arasynda básekelestik baıqaldy», - deıdi Arman Júsipov.
Baıqaý qorytyndysy boıynsha birinshi jasaqtyń quramyndaǵy sottalǵan «Úzdik músinshi» atandy. Ol yntalandyrý retinde týystaryna kezekten tys beıneqońyraý arqyly habarlasý múmkindigine ıe boldy.
