Pavlodarlyq fýtbolshylar Eýropa lıgasynyń ekinshi irikteý raýndyndaǵy syrt alańdaǵy ekinshi matchyn ótkizedi
ALMATY. 25 shilde. QazAqparat - Búgin Talǵat Basýfınov jattyqtyratyn pavlodardyń «Ertis» fýtbol komandasy Bosnııa jáne Gertsegovınanyń Shırokı Brıeg qalasynyń aıaqdopshylarymen Eýropa lıgasynyń ekinshi irikteý raýndyndaǵy ekinshi matchyn ótkizedi.
Buǵan deıin olar Pavlodarda bul quramany 3:2 esebimen utqan bolatyn.
1948 jyly qurylǵan atalmysh komanda Bosnııa jáne Gertsegovına chempıonatynda 2 dúrkin (2004, 2006) top jaryp, 4 ret kúmis (2005, 2008, 2010, 2012) , 1 ret qola (2005) júldeger atanǵan. Sondaı-aq el kýbogyn 2 dúrkin (2007, 2013) ıelendi. Buǵan deıin Eýropa lıgasynda 4 ret óner kórsetken olar 3 ret ekinshi irikteý raýndynda, 1 ret birinshi irikteý raýndynda súringen bolatyn. Al «Ertis» Qazaqstan chempıonatynyń 5 dúrkin (1993, 1997, 1999, 2002, 2003) chempıony jáne 4 dúrkin (1994, 1996, 2004, 2012) kúmis, 5 dúrkin qola (1992, 1998, 2000, 2008, 2010) júldegeri. 1997/98 jylǵy maýsymda el kýbogyn ıelengen bul komanda Eýropa lıgasynda 2009/2010 jylǵy maýsymda irikteý raýndynda birinshi, 2011/2012 jylǵy maýsymda ekinshi raýndta jarys jolynan shyǵyp qalǵan edi. 2012/2013 jylǵy maýsymda birinshi irikteý raýndynda Bolgarııanyń Sofııa qalasynyń «Levskı» komandasymen birinshi matchta 0:0 esebimen teń túsip, ekinshi matchta 2:0 esebimen basym túsken bolatyn. Eger ekinshi raýndtan sátti ótetin bolsa óz tarıhynda Eýropa lıgasyndaǵy jańa rekordqa qol jetkizedi.
