Pavlodarlyq fermerler Nur-Sultan turǵyndaryna 160 tonna aýyl sharýashylyǵy ónimin jetkizedi
PAVLODAR. QazAqparat - Nur-Sultan qalasynda bolatyn aýyl sharýashylyǵy jármeńkesi eki kún jumys isteıdi, dep habarlaıdy pavlodarnews.kz.
Oblystyq aýyl sharýashylyǵy basqarmasynyń baspasóz qyzmeti málim etkendeı, jármeńke «Han Shatyr» saýda-oıyn-saýyq ortalyǵynyń janyndaǵy alańda ótedi.
«6 jáne 7 shilde kúnderi Nur-Sultan qalasyndaǵy aýyl sharýashylyǵy jármeńkesine oblystyń barlyq aýdandary men qalalarynan 70-ten astam aýyl sharýashylyǵy kásiporny qatysady. Onyń ishinde 60 tonnadan astam et jáne et ónimderi, 20 tonna sút jáne 80 tonna bakaleıa ónimderi: jarmalar, un, nan-toqash ónimderi, bal, ósimdik maıy jetkiziledi», - dep atap ótti vedomstvoda.
Elordaǵa óz ónimderin Qazaqstannan basqa elderde de tanylǵan «Rýbıkom», «KEMMI», «Galıtskoe», «Krendel» JShS usynǵaly otyr. «Aqjar Óndiris» JShS bir tonna qymyz jáne bir tonna konservilengen et jetkizedi. Sondaı-aq, 6 shildede Pavlodarda da merekelik aýyl sharýashylyǵy jármeńkesi ótedi. 20 tonnadan astam ónim dúkenderge qaraǵanda 10-15%-ǵa arzan baǵamen satylatyn bolady. Úsh sút tasyǵyshta sút ákelinedi. Qala kásiporyndarynan basqa, jármeńkege Maı jáne Pavlodar aýdandarynyń kásiporyndary da qatysady.
