Pavlodarlyq Ertis hokkeı klýbyna 14 jańa oıynshy keldi
PAVLODAR. QazAqparat – Pavlodarlyq hokkeı klýby el chempıonatyndaǵy oıyndaryn 19 qyrkúıekte bastaıdy, dep habarlaıdy Pavlodarnews.kz.
Bul týraly Ertis hokkeı klýbynyń baspasóz qyzmeti málim etti.
«Klýb maýsym aldyndaǵy daıyndyǵyn Nur-Sultan qalasy mańyndaǵy Mıchýrın kentinde bastaıdy. Ol jerdegi sport bazasy barlyq kerekti quraldarmen jabdyqtalǵan. Daıyndyq barysynda birneshe joldastyq kezdesýler ótkizý josparlanǵan. Daıyndyq 17 qyrkúıekke deıin jalǵasady», - dedi baspasóz qyzmeti.
Al, Ertis HK maýsymdaǵy alǵashqy oıynyn 19 qyrkúıek kúni Qulager komandasyna qarsy ótkizedi.
Maýsymaralyq demalysta pavlodarlyq komandanyń sapyna 14 hokkeıshi qosyldy. Onyń 2-ýi – qaqpashy, 4 – qorǵaýshy, 8 – shabýylshy. Arasynda Qazaqstan chempıony jáne Qurlyqtyq Kýboktyń ıegeri qaqpashy Ivan Poloshkov bar.
Sonymen qatar, klýb 14 oıynshymen qosh aıtysqan. El birinshiligi bastalar aldynda komanda sapynda 26 oıynshy tirkelgen.
Eske salaıyq, ótken maýsym qorytyndysy boıynsha Ertis hokkeı klýby qurlyqtyq dodada Qazaqstan namysyn qorǵaıtyn múmkindik alǵan bolatyn. Alaıda, qarjylyq qıyndyqtarǵa baılanysty ol múmkindikten bas tartty.
Ertis HK - Qazaqstannyń 3 dúrkin chempıony. El chempıonatynyń bir márte kúmis jáne qola júldegeri. Bir márte Qazaqstan kýboginiń ıegeri atanǵan.
