Pavlodarlyq ekstremal Qazaqstannyń rekordtar kitabyna endi
PAVLODAR. QazAqparat - Pavlodar qalasynyń turǵyny Jeńisbek Qadyruly ekstremal janry boıynsha «Temir adam» retinde Qazaqstannyń rekordtar kitabynyń sertıfıkatyna ıe boldy, dep habarlaıdy pavlodarnews.kz.
«Rekordtar kitabyna ený úshin barlyq qujattarym men BAQ-ta shyqqan maqalalardy, vıdeolardy tapsyrǵan bolatynmyn. Arnaıy komıssııa bir jyldaı qarap, Almaty qalasynyń «Turan» ýnıversıtetinde ótken saltanatty marapattaý rásimine shaqyrtý aldym. Alaıda, túrli sebepterge baılanysty bara almadym. Uıymdastyrýshylar elimiz boıynsha 2014-2018 jyldar aralyǵynda engen adamdar týraly málimetter jınastyrylǵan kitapty berip jiberdi. Bul Allanyń bergen kúsh-qýaty, ata tegimizben daryǵan óner dep bileminá,- deıdi Jeńisbek Qadyruly.
Jeńisbek Qadyruly 1972 jyly Mońǵolııanyń Baıan-Ólgeı aımaǵynda dúnıege kelgen. Salmaǵy bes keli bolyp týǵan balany anasy Shárbaný kóp ýaqytqa deıin eshkimge kórsetpeı ósirgen. Úsh jasynda oınap júrip, úlken qozylardy ustap mingende belin syndyryp jibergen. Pyshaqpen denesin kesip, ótkir aranyń júzine, shynynyń ústine jatyp, ústinen on shaqty adamdy ótkizetin ekstremal tisimen 32 kelilik kir tasyn kóteredi. Sondaı-aq, eki shynashaǵymen kóteretin eki 16 kelilik kir tasynyń salmaǵyn 24 kelige deıin jetkizýdi josparlap otyr. Biregeı óner ıesi 12 jasynda erekshe tús kórgenin aıtady.
«Túsimde bir adamnyń «Pyshaqpen deneńdi kesseń, qan shyqpaıdy» dep aıtqany esimde. Sodan aqyryn eshkimge kórsetpeı tájirıbe jasaı bastadym. Alǵash ret Abaıdyń 150 jyldyǵynda kópshiliktiń aldynda tamaǵymdy kesip kórdim»,- deıdi ol.
Aıta keterligi, ekstremal 2012 jyly «Aımaqtar alamany» respýblıkalyq jobasyna qatysyp, bas júldeni jeńip alǵan. QR «Mádenıet maıtalmany» medalimen marapattalǵan. Omby qalasynyń 300 jyldyǵynda úsh kún qatarynan óner kórsetip, «Batyr Jeńisbek» degen ataqqa ıe bolǵan. «Qazaqstannyń erekshe bes adamy» qataryna engen. Qazirgi tańda G. Potanın atyndaǵy Pavlodar oblystyq tarıhı-ólketaný mýzeıinde kópshilik aǵartý bóliminiń mamany bolyp jumys isteıdi.
