Pavlodarlyq delegatsııa maqtaraldyq turǵyndardy jumysqa shaqyrdy
ShYMKENT. QazAqparat - Eńbek naryǵyn teńestirý baǵytynda qolǵa alynǵan memlekettik joba boıynsha Ońtústik Qazaqstan oblysynyń Maqtaral aýdanyna pavlodarlyq delegatsııa keldi.
Lebıaji, Jelezın aýdandarynyń basshylary men jumyspen qamtý, áleýmettik baǵdarlamalar bólimderiniń ókilderi myrzashóldikterge jobanyń tıimdi tustaryn aıtty. Soltústik oblystarda belsendi eńbek etýge shaqyrdy, dep habarlaıdy QazAqparat tilshisi.
Bos jumys oryndary Sharbaqty aýdandyq ortalyq aýrýhanasy men bilim uıalarynan da usynyldy. Jalpy, jıyn oqý ornyn bitirip, jumys taba almaı qınalǵan jastar men jas otbasylarǵa tıimdi boldy. Pavlodarlyq delegatsııa ondaǵy mektepterde tipti, oqýshy da tapshy ekenin jasyrmady. Máselen, 11-shi synypty bitirgen túlekterdiń ózi Reseı asyp, sol jaqtyń joǵary oqý oryndaryna túsip jatyr. Qaıtyp kelýge de qulyq tanytpaıdy eken. Sondyqtan soltústik oblysta ıgeretin is te, jer de jetedi. Baspana da qymbat emes. 200 -800 myń teńgeniń aralyǵynda, - dedi bólim basshylary.
«Biz munda jas mamandardy shaqyrýǵa keldik. Óıtkeni, bizde aǵylshyn tili muǵalimi, matematıka, qazaq tili, tarıh pánderiniń muǵalimderi men tárbıeshiler jetkiliksiz. Sondyqtan, bizdiń aýdanda kelgen kisilerdi qýana kútemiz. Ár muǵalimge úı beriledi. Ol oryndarǵa januıamen kele me? Sol januıalaryna ár kisiniń ózine kómek kórsetiledi. Ol kisilerdi aparǵannan keıin túgel jaǵdaılaryn jasaımyz»,- dedi Aqtoǵaı aýdandyq bilim bóliminiń bas mamany Saltanat Syzdyqova.
Jalpy, eńbek naryyyǵyn teńestirip, soltústik oblys halqyn 5 mıllıonǵa jetkizý - aldaǵy 20 jyldyń mejesi. Bul baǵytta memleketten qoldaý kóp. Jol shyǵyny, jatyn oryn - bári qarastyrylǵan. Sol maqsatta soltústik oblysynyń delegatsııa músheleri aýdan, aýyldardy aralap, jas mamandardy jumysqa shaqyrýda.
