Pavlodarlyq dárigerler eki ret júregi toqtap qalǵan áıeldi aman alyp qaldy

37 jastaǵy júkti áıel Aqsý qalasynyń aýyldyq aımaǵy Eńbek aýylynda turady. Birneshe kún boıy jótel, qaqyryq, álsizdik, keýde qýysynyń aýyrýy, merzimdi tahıkardııa mazalaǵan soń aýyl turǵyny halyqtyq emdeý ádisterimen emdelgen.
Tek demikpe paıda bolǵan kezde ǵana aýrýhanaǵa júgingen. Sol jerde qan qysymynyń tómendegeni jáne satýratsııa kórsetkishinde qaýip bar ekeni anyqtalǵan.
Bul týraly oblystyq kardıologııalyq ortalyqtyń kardıohırýrgııa bóliminiń meńgerýshisi Murat Raıhanov aıtty.
– Ony shuǵyl túrde Pavlodar qalasynyń №1 aýrýhanasynyń ınfektsııalyq statsıonaryna jetkizdi, - dep habarlady doktor. – Qabyldaý sátinen bastap jeti mınýttan keıin júrek qyzmeti toqtap qaldy, biraq dárigerler bes mınýttan keıin júrek yrǵaǵyn qalpyna keltire aldy.

Kompıýterlik tomografııa pnevmonııa dıagnozyn rastamady. Degenmen júrektiń ýltradybystyq zertteýi mıtraldy qaqpaqshanyń patologııasyn, mıtraldy qaqpaqshanyń aldyńǵy qaqpaǵynyń úzilgenin, 3-4 dárejeli mıtraldy qaqpaqshanyń jetkiliksizdigin kórsetti, bul jedel tynys alý jáne júrek jetkiliksizdigine ákeldi.
Dárigerler áıeldi shuǵyl túrde kardıologııalyq ortalyqqa aparýdy sheshken.
- Qysym 50-60, tómen satýratsııa, ókpeni jasandy jeldetý apparatyna qosylǵan, komaǵa túsken jáne ókpe isinýi. Naýqas sondaı jaǵdaıda boldy, – dedi kardıoortalyqtyń anestezıologııa bóliminiń meńgerýshisi, oblystyń shtattan tys bas anestezıology Inna Glovatskaıa. – Ol ólim aýzynda jatty, naýqasty osyndaı aýyr jaǵdaıda tasymaldaý qaýipti boldy. Tasymaldaý aldynda aýystyra bastaǵan kezde júregi toqtap qaldy. Reanımatsııalyq sharalardyń 20-mınýtynda júregi soǵa bastady, qysym men satýratsııa birtindep joǵarylady. Biz sırenamen kardıologııa ortalyǵyna bet aldyq. Jolda hırýrgterr eskertildi. Júkti áıel jolda ólip ketýi múmkin dep oılaýǵa ýaqyt bolmady. Bar oıym - ony aman alyp qalý edi.

Murat Raıhanovtyń aıtýynsha, tehnıkalyq turǵydan operatsııa aýyr bolmaǵan, bul aýrýhanada mundaı operatsııa kópten beri jasalady. Patsıenttiń klınıkalyq ólim jaǵdaıynda jatqany jáne júkti bolýy jaǵdaıdy qıyndatty.
– Biz áıeldiń qandaı jaǵdaıda ákelinetinin bildik, operatsııalyq bólmeni tez arada daıyndap, kelip túskennen keıin birden jasandy qan aınalymdy qosý arqyly operatsııany bastadyq. Bul onyń ómirin saqtaýǵa kómektesti, - dep kardıohırýrgııa bóliminiń meńgerýshisi eske aldy. - Biraq hırýrgııalyq aralasýdan keıin de jasandy qan aınalymynan shyqqan kezde júrek qyzmeti qalpyna kelmedi, reanımatsııalyq sharalardyń uzaqqa sozylýyna baılanysty júrek álsirep qaldy.

Naýqas ekstrakorporaldy membranalyq oksıgenatsııa apparatyna qosyldy. Mundaı jabdyq tek kardıo ortalyqta ǵana bar, ol júrek pen ókpeni qalpyna keltiýrge kómektesedi.
Pavlodarlyq dárigerler eki ret júrek ustamasynan keıin áıel adamnyń mıy tirshilikti toqtatýy múmkin degen qaýippen elordalyq nevrologtarmen birneshe konsılıým ótkizdi.
Operatsııadan keıingi segizinshi kúni ǵana naýqas esin jınaı bastady. Qazir ol ózine keldi, ózdiginen dem alady, súıemeldeýmen turyp, palatada júre alady.
- Ol esin jınap, qalpyna kele bastaǵan kezde qandaı kúıde bolǵanymyzdy sózben aıtý múmkin emes, – deıdi oblystyń bas shtattan tys anestezıology.

Dárigerler naýqasty reanımatsııadan ortalyq bólimine aýystyrýdy josparlap otyr.
– Ókinishke oraı, reanımatsııalyq sharalar sharanaǵa áser etpeı qoımady, ózdiginen túsik tastaý boldy, - dep tolyqtyrdy Murat Raıhanov. - Ananyń jaǵdaıy jaqsy. Eki aýrýhananyń dárigerleriniń komandalyq jumysy jaqsy nátıje berdi, barlyǵy tez, saýatty, kásibı jumys jasady.

O dúnıeden oralǵan aýyl turǵynynyń kúıeýi bes ulynyń fotosýretterimen shaǵyn vıdeo túsirip, «Kimniń ómirin qutqarǵandaryńyzdy qarańyz!» degen áserli habarlama jibergen.