Pavlodarlyq dárigerdi zorlaǵan taksıstiń isi: Tergeýshi qyzmetinen qýyldy
PAVLODAR. QazAqparat – Pavlodarda dáriger qyzdy zorlap, uıaly telefonyn tartyp alǵan taksıstke qatysty isti tergeýmen aınalysqan polıtseıler jazalandy, dep habarlaıdy QazAqparat tilshisi.
«Sózbuıdaǵa jol bergeni jáne tergeý sapasynyń tómen bolýyna baılanysty Ózindik qaýipsizdik basqarmasy Pavlodar polıtsııa basqarmasynyń qyzmetkerlerine qatysty qyzmettik tergeý júrgizdi. Onyń nátıjesinde, tergeýshi laýazymynan bosatyldy. Birneshe basshy tártiptik jazaǵa tartyldy», - dep málim etti Pavlodar oblystyq Polıtsııa departamentiniń bastyǵy general Amantaı Áýbákirov.
Eske salaıyq, 1 qazan kúni jábirlenýshi men onyń qorǵaýshysy A.Áýbákirovtyń jeke qabyldaýynda boldy. Al búgin PD basshysy Ózindik qaýipsizdik basqarmasy oblystyq Polıtsııa departamentiniń qyzmetkerlerine qatysty qyzmettik tergeýdi bastaǵanyn málim etken edi.
Oqıǵa bıyl, 1 maýsymnan 2 maýsymǵa qaraǵan túni bolǵan. Ápkesi men aǵasy keshke InDriver mobıldik qosymshasy arqyly taksı shaqyrǵan. Júrgizýshi qyzdyń aǵasyn birinshi jetkizip tastap, emhanada dáriger bolyp jumys isteıtin ózin odan ári ákele jatqan. Biraq úıine jeter-jetpes jerde kóliktiń esikterin buǵattap, qyzdy zorlaǵan. Buǵan qosa, quny 280 myń teńge turatyn «Aıfon-8» telefonyn alyp qoıyp, ózin mashınadan shyǵaryp jibergen.
Jábirlenýshi polıtsııaǵa júgingennen keıin kúdiktiniń týystary onyń izine túsip, 100 myń teńge usynǵan jáne aryzyn qaıtyp alýdy suraǵan.
Avtory: Anton Gagarın
