Pavlodarlyq búldirshinder balabaqshaǵa saýsaq tańbasymen kirgizile bastady
PAVLODAR. QazAqparat - Pavlodardaǵy №29 balabaqshada ǵımaratqa saýsaq tańbasymen kirgizetin «Smart Pavlodar» pılottyq jobasy iske qosyldy, dep habarlaıdy pavlodarnews.kz.
Mekemeniń kez kelgen tobynyń kireberisinde balanyń kelip-ketken ýaqytyn qadaǵalaıtyn esepteýish quraldar ornatylǵan. Ol úshin arnaıy qurylǵyǵa aldymen ata-ana, artynan tárbıeshi saýsaqtaryn qoıady. Derekter bazasynda balany qaı ýaqytta ákelip, áketkeni týraly málimetter birden shyǵady.
Dál sol ýaqytta ata-ananyń uıaly telefonyndaǵy «Smart Pavlodar» qosymshasyna habarlandyrý keledi. Bul qosymshany PlayMarket nemese v AppStore-dan tegin júktep alýǵa bolady.
Bul rette baǵdarlamaǵa eresek adamdardyń saýsaq tańbasyn shekteýsiz kólemde engizip qoıýǵa bolady. Ol úshin otbasy múshesi ákimshilikke ótinish jazsa jetkilikti. Bazaǵa engizý nebári 5-10 mınýt ýaqytty alady.
«Eger buryn balany kózimizshe ákelip, áketip júrse, endi bul protsesterdiń barlyǵy avtomattandyryldy. Qazir qurylǵyny jetildirý jumystaryn tereńdete tústik. Eki tilde daýysty taný júıesimen aınalysyp jatyrmyz. Ázirge ol testileýden ótýde. Keıin osy balabaqshaǵa engizetin bolamyz», - dedi «BFGroupInc» JShS basshysy Sergeı Golyshev.
Sáıkestendirý kezinde jasyl jáne qyzyl túster janady. Qyzyl janǵan kezde tárbıeshi balanyń aýyrǵany týraly anyqtamanyń bolmaýy nemese balabaqsha aqysynyń tólenbeýi saldarynan búldirshindi qabyldaı almaıdy. Baǵdarlama ata-anany dereý basshylyqqa nemese medıtsınalyq pýnktke jiberedi. Alaıda, uıaly qosymsha qoldanýshylaryna erterek habar taratylatyndyqtan, mundaı jaǵdaılardyń aldyn alýǵa bolady.
