Pavlodarlyq boıjetken «Qazaq arýy-2019» atandy
ASTANA. QazAqparat - Astanada «Qazaq arýy - 2019» ulttyq baıqaýynyń jeńimpazy anyqtaldy, dep habarlaıdy QazAqparat «Habar 24» telearnasyna silteme jasap.
Básekege 600-den asa boıjetken qatysýǵa nıet tanytqan. Olardyń tek 18-i iriktep alynyp, sońǵy synǵa joldama aldy.
«Qazaq arýy» baıqaýy bıyl 9-ynshy jyl uıymdastyryldy. Sáıkesinshe, qatysýshylar arasyndaǵy básekede de joǵary boldy. Uıymdastyrýshylar da talapty kúsheıte túsken.
«Jyl saıynǵy talap bul - qyz balanyń syrtqy sulýlyǵy ǵana emes, ishki jan-dúnıesiniń baı bolýy. Qazaq eliniń tarıhyn, mádenıetin, salt-dástúrin bilý jáne eń bastysy qazaq tilin jetik bilý», - dedi qazylar alqasynyń múshesi Arman Seıitmamyt.
Buǵan qosa, qyzdardyń boıy 170 santımetrden kem emes, al jasy 22-den joǵary bolmaýy tıis. 18 arý sheshýshi synda 4 kezeń boıynsha óner kórsetip, jyl úzdigin anyqtady.
Nátıjesinde, «Altyn táj» Pavlodar oblysynyń namysyn qorǵaǵan Sánııa Temirxanovaǵa buıyrdy. Ol shyǵarmashylyq kezeńde Abaı óleńderin jatqa oqyp, sulýlyq pen parasattylyqtyń jarqyn úlgisin kórsetti.
«Qazaq arýy» degen ataqqa laıyqty qyzdyń aqyly kórkine saı bolýy kerek. Biz osyǵan baılanysty talaptardy kúsheıttik. Keıin sol arýdyń basqalarǵa úlgi bolǵanyn qalaımyz», - deıdi baıqaýdyń bas prodıýseri Baıan Alagózova.
Buǵan deıin «Qazaq arýy - 2019» baıqaýyna kastıng jarııalanǵanyn habarlaǵan bolatynbyz.
