Pavlodarlyq áıel túrmedegi tanysyna temekige orap esirtki ótkizbek boldy
PAVLODAR. QazAqparat – Pavlodardaǵy AP-162/4 túzeý mekemesiniń qyzmetkerleri túrmege esirtki ótkizý oqıǵasyn anyqtaǵan, dep habarlaıdy QazAqparat tilshisi.
«1987 jyly týǵan, urlyq jasaǵany úshin 8 jylǵa sottalǵan azamatqa berilgen zattardy tekserý kezinde temeki ishine kók tústi zat salynǵany baıqalǵan. Qaýipti zatty tanysyna 1955 jyly týǵan áıel alyp kelgen», - dep habarlady Pavlodar oblystyq qylmystyq-atqarý júıesi departamenti.
QTJD málimeti boıynsha, bir qaraǵanda, jiberilgen zatta erekshe eshteńe baıqalmaǵan: jyly kıimder, azyq-túlik, jýý quraldary.
«Degenmen, rejım bóliminiń qyraǵylyǵynyń arqasynda temekidegi fıltr men tuqyl arasynan kókshil tústi zat tabylǵan. Oqıǵa ornyna Pavlodar qalalyq polıtsııa basqarmasy soltústik bóliminiń qyzmetshileri shaqyryldy», - dep qosty departamenttegiler.
Saraptama nátıjesi boıynsha tabylǵan zat psıhotropty jáne esirtki qataryna jatatyny, sonymen qatar paıdalanǵan kezde adamnyń oılaý júıesi buzylatyny anyqtalǵan.
«Esirtki ótkizbek bolǵan azamatsha Qazaqstan Respýblıkasy Qylmystyq Kodeksi 296-baby boıynsha jaýapkershilikke tartyldy», - dep málimdedi aımaqtyq QAJD.
