Pavlodarlyq áıel esirtkini ysqyshtyń ishine salyp, túrmege kirgizbek boldy
PAVLODAR. QazAqparat – Pavlodar qalasynyń turǵyny AP-162/4 túzeý mekemesine esirtki kirgizbek boldy, dep habarlaıdy QazAqparat qylmystyq atqarý júıesi komıtetiniń baspasóz qyzmetine silteme jasap.
Túrmege kelgen sálemdemelerdi qaraý kezinde Pavlodar qalasynyń turǵyny ákelgen banderolden esirtki tabyldy. Ol ósimdik tektes esirtki zatyn aıaq kıimge arnalǵan ysqyshtyń ishine salyp ákelgen.
«Túrmege tyıym salynǵan zattardy kirgizý úshin adamdar neshe túrli aıla-sharǵy oılap tabatyn boldy. Jyl basynan beri sottalýshylardyń týystary men tanystary tyıym salynǵan zattardy aıaq kıimniń ókshesine, azyq-túliktiń arasyna, tipti qoltyqty terletpeıtin antıperspıranttyń ishine de salyp ótkizbek boldy» delingen habarlamada.
Atalǵan fakti boıynsha Pavlodar qalalyq polıtsııasynyń tergeý toby shaqyryldy.
