Pavlodarlyq avtoshabandozdar muz ústinde jarysqa tústi
ASTANA. QazAqparat - Pavlodar qalasyndaǵy Ýsolka ózeniniń alqabynda «Vıýga-2017» aımaqaralyq avtojarysy ótti.
Osymen úshinshi jyl qatarynan uıymdastyrylyp otyrǵan báseke aıasynda 30-dan astam qatysýshy baq synap, úzdik avtoshabandoz ataǵyn sarapqa saldy dep habarlaıdy pavlodarnews.kz.
Bıyl dástúrli jarys Pavlodar, Ekibastuz, Aqsý qalalarynan bólek Astana, Qaraǵandy qalalarynan kelgen avtoshabandozdardyń basyn qosty. Uıymdastyrýshylardyń aıtýynsha, qatysýshylar sany jyl sanap artyp keledi.
«Bul shara Almaty qalasynda jalaýyn jelbiretken qysqy Ýnıversıada oıyndarynda oblysymyzdyń namysyn qorǵap jatqan sportshylarymyzdy qoldaýǵa arnalyp otyr. Olardyń jetistikteri bizdiń qatysýshylarymyzdy qanattandyra túsedi dep esepteımin. Qýantarlyǵy, jyl saıyn jarysta baq synaýǵa nıet bildirgen avtoshabandozdardyń qatary artyp keledi», - deıdi «RedZone» qoǵamdyq birlestiginiń jetekshisi Konstantın Mýzalevskıı.
Atap óterligi, bıyl muz ústindegi jarys joly sál yqshamdalǵan. Biraq odan sporttyq sharanyń áserliligi azaıǵan joq. Kerisinshe, erekshe, ári qaýipti avtobásekeni tamashalaýǵa kelgen turǵyndardyń qarasy kóp boldy. Olardyń qatarynda Pavlodar oblysynda jumys saparymen júrgen QR Parlamenti Májilisiniń depýtattary bar. Sondaı-aq, uıymdastyrýshylar Kenjekól aýylyndaǵy otbasylyq tıptegi balalar úıiniń tárbıelenýshilerin jarysty tamashalaýǵa arnaıy aldyrtqan. Avtoshabandozdar temir tulparlarynyń erekshelikterine qaraı tórt topqa bólinip, jarys jolyna shyqty. Muz ústindegi buralańqy joldarmen júıtkigen kólikter sharany tamashalaýǵa kelgen pavlodarlyqtarǵa erekshe áser syılady. Jarys jeńimpazdary alǵys hattar men arnaıy syılyqtarǵa ıe boldy.
Aıta keterligi, «Vıýga-2017» avtojarysy Pavlodar qalalyq ákimdiginiń, qalalyq sport jáne dene tárbıesi bóliminiń qoldaýymen uıymdastyryldy.
