Pavlodarlyq alty jasar sýretshi qyz Chehııadan júldemen oraldy
PAVLODAR. QazAqparat - № 2 balalar kórkemsýret mektebiniń oqýshysy Anıa Kýdınova Chehııanyń Lıdıts qalasynda ótken «Sý - altynnan da qymbat» atty 46-shy Halyqaralyq kórkem týyndylar kórmesinen oljaly oraldy, dep habarlaıdy pavlodarnews.kz.
Bıyl baıqaýǵa Qytaı, Japonııa, Fılıppın, Úndistan, Kenııa, Malaızııa, Shrı-Lanka, Zımbabve sııaqty barlyǵy álemniń 79 elinen 2900 adam qatysqan. Bul rekordtyq kqrsetkish bolyp otyr.
«Sharaǵa mektep oqýshylarynyń 17 sýreti jiberildi. 6 jasar Anıa Kýdınova «Sýda» jumysy úshin qurmet gramotasymen marapattalyp, baıqaýdyń jınaqtaý kórmesi quramyna endi. Anıa óziniń kompozıtsııasyn gýash boıaýlaryn paıdalana otyryp, súıikti keskindeme tehnıkasynda oryndady. Ol atalmysh mektepte ekinshi jyl bilim alýda. Osy aralyqta birneshe ret ártúrli saıystarǵa qatysyp úlgerdi. Saıys qatysýshysyn keskindeme pániniń tájirıbeli mamany, mektep basshysy Natalıa Gerýsova daıyndady»,-deıdi qalalyq bilim bóliminiń mamandary.
Aıta keteıik, komıssııa músheleri qatysýshylar arasynan eń úzdik dep tanylyp, marapatqa ıe bolǵan 1246 jumysty iriktep aldy. Bul is-shara ıÝNESKO-nyń qoldaýymen Cheh respýblıkasynyń Mádenıet mınıstrligi uıymdastyrdy. Bolashaqta ótetin saıystyń taqyryby «Hımııa» bolmaq.
