Pavlodarlyq aqyn Aspanbek Shuǵataev - «Altyn dombyra» ıegeri
ASTANA. QazAqparat - Almatyda Respýblıka saraıynda eki kún boıy ótken «Táýelsizdikke taǵzym» atty taqyrypta «Altyn dombyra» respýblıkalyq aqyndar aıtysy óz máresine jetti.
Keshe aıtystyń birinshi týrynda 22 aqyn 11 jup bolyp aıtysqan bolatyn. Búgin aqtyq synǵa shyqqan aqyndar aıtysynyń qorytyndysy belgili boldy. Aqtyq saıysty tamashalaýǵa Almaty ákimi Baýyrjan Baıbek arnaıy keldi.
Aıtystyń qorytyndysy boıynsha bas júlde pavlodarlyq aqyn Aspanbek Shuǵataevqa buıyrdy. Ol «Altyn dombyra» men 3 mln. teńgeni qanjyǵasyna baılady. Sonymen birge bul aqyn 150 myń teńge bolatyn yntalandyrý syılyǵyna da ıe boldy.
Birinshi oryn qostanaılyq azýly aqyn Aıbek Qalıevke buıyrdy. Ol 2 mln teńge aldy. Ekinshi oryn alǵan Iranǵaıyp Kúzembaev pen Meıirbek Sultanhan 1 mln. teńgeni enshiledi. Úshinshi oryn úsh aqynǵa buıyrdy. Olar - Qalıjan Bildáshev, Jansaıa Mýsına men Erkebulan Qaınazarov (500 myń teńge). Esterińizge sala keteıik, 2012 jyly «Altyn dombyranyń» alǵashqy ıegeri qyzylordalyq Muhtar Nııazov boldy. Kelesi jyly bul báıgeniń bas júldesin Jandarbek Bulǵaqov ıelense, 2014 jyly Balǵynbek Imashevtiń enshisine buıyrǵan bolatyn.
