Pavlodarlyq «Aqsý» premer-lıgada jeti týrdan keıin jeńiske jetti
ASTANA. QazAqparat - Búgin fýtboldan premer-lıga komandalary arasyndaǵy el birinshiliginiń 11-týryndaǵy alǵashqy oıynnyń nátıjesi belgili boldy, dep habarlaıdy QazAqparat tilshisi.
Bul týrdaǵy alǵashqy oıyn Pavlodar oblysynyń «Aqsý» jáne Taldyqorǵannyń «Jetisý» komandalary arasynda ótti.
Pavlodarlyq klýb bıylǵy birinshilikti sátsiz oınap keledi. Saldarynan nebári tórt upaımen 13-orynda tur.
Taldyqorǵandyq komanda da birinshilikte ala-qula oıynymen kózge túsip otyr. Qazir on upaımen 11-orynǵa jaıǵasqan.
Kezdesý barysynda pavlodarlyq klýb jeńiske jetý jolyn izdedi.
Nátıjesinde olardyń qatarynan 38-mınýtta Chıdı Osýchýkvý esep ashsa, taldyqorǵandyq klýbtan Aslan Ádil 64-mınýtta tarazy basyn teńestirdi.
Al 67-mınýtta Chıdı Osýchýkvý qaıtadan «Aqsýdy» alǵa shyǵardy.
Osylaısha pavlodarlyq klýb qarsylasynan 2:1 esebimen basym tústi. Olar buǵan deıin qatarynan jeti týr boıy jeńilistiń aşy dámin tatyp kelgen edi.
Endi 17.00-de «Kaspıı» (Aqtaý) men «Shahter» (Qaraǵandy), 18:00-de «Maqtaral» (Túrkistan oblysy) men «Qaırat» (Almaty) sheberlik baıqasady.
Al 28 mamyrda «Oqjetpes» (Kókshetaý) pen «Tobyl» (Qostanaı), «Qyzyljar» (Petropavl) men «Ordabasy» (Shymkent), «Atyraý» men «Astana», «Qaısar» (Qyzylorda) men «Aqtóbe» jasyl alańǵa shyǵady.
