Pavlodarlyq 11 sheneýnik áleýmettik jelidegi sýretteri úshin jaýapqa tartyldy

PAVLODAR. QazAqparat - Pavlodar oblysynda 354 memlekettik qyzmetshiniń áleýmettik jelidegi paraqshasyn tekserýdiń nátıjesinde 11 memlekettik qyzmetshi eskertý túrinde jaýapqa tartylǵan, dep habarlaıdy pavlodarnews.kz.

Bul týraly búgin óńirlik kommýnıkatsııalar qyzmetinde ótken baspasóz jıynynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi Pavlodar oblysy boıynsha departamentiniń basshysy Ádilbek Muqashev aıtty.

- Memlekettik qyzmetshilerdiń áleýmettik jelidegi paraqshalaryn tekserý barysynda 200 orynsyz sýret anyqtaldy, - deıdi Ádilbek Muqashev. - Kóptegen jaǵdaıda olar qymbat kóliktiń qasynda jáne kóńil kóterý oryndarynda túsken. Sonymen qatar  QR ISM tehnıkalyq retteý jáne metrologııa komıtetiniń qyzmetkeri - memlekettik baqylaýdy saraptaý jáne monıtorıng basqarmasynyń bas sarapshysy óziniń VKontakte áleýmettik jelisinde dóreki túrde bylapyt sózdermen pikir qaldyrǵan.

 Spıkerdiń aıtýynsha, memlekettik qyzmet jáne jemqorlyqqa qarsy zańnamany saqtaý salasy boıynsha  ótken jyly 198 shaǵym túsken. Onyń basym bóligi konkýrsty ótkizý, laýazymdyq mindetterdi tıisti deńgeıde oryndamaǵany úshin tártiptik óndiris salý, shaǵymdardy qaraý tártibin buzý jáne  iskerlik etıketti saqtamaýǵa qatysty. Osyǵan baılanysty júrgizilgen 66 tekseristiń nátıjesinde 550  zańbuzýshylyq anyqtalǵan. Olqylyqtardy joıý úshin 33 usynym engizilip, 142 adamnyń quqyǵy qalypqa keltirilgen jáne 77 memlekettik qyzmetshi  tártiptik jaýapkershilikke tartylǵan. -  Máselen, densaýlyq saqtaý basqarmasynyń mamandary men  oblystyq orman sharýashylyǵy jáne  janýarlar dúnıesi aýmaqtyq ınspektsııasy bas mamanynyń ótinishine sáıkes  merzimnen tys, merekelik jáne demalys kúnderi atqarǵan jumysy úshin  ótemaqy tólemeý, zańsyz tártiptik jaýapkershilikke tartý  boıynsha tekseris júrgizilgen.  Nátıjesinde atalǵan faktiler rastaldy jáne olardyń quqyqtary qalypqa keltirildi, - deıdi  Ádilbek Muqashev.