Pavlodarlyqtar Korıakov kóliniń ekologııalyq jaǵdaıyna alańdap otyr

Pavlodardyń soltústiginde ornalasqan qyzǵylt sý aıdyny — Korıakov kólin memleket erekshe qorǵaýǵa alýy kerek dep esepteıdi jergilikti jastar. Májilis depýtattarymen ótken kezdesýde pavlodarlyqtar kóldiń tuzyn «Mýltıservıs» kompanııasy men jeke azamattar tıimsiz paıdalanyp jatqanyna alańdaýshylyq tanytty, dep habarlaıdy Kazinform.

Korıakov — alys-jaqynǵa tanymal kól. Ótken ǵasyrlarda bul jerde tuz óndirisi jaqsy damyǵan.

Jazǵy ýaqytta sýy qyzǵylt tartyp, alystan qaraǵanda óte áserli kórinedi. Kópshilik bul jerdi jıi qyzyqtap, sýretke túskendi unatady.

Alystan ádeıi izdep kelip, shıpaly sýyna shomylatyndar da bar. Kóldiń ústimen tuz tartqan ertedegi aǵash kópirdiń baǵandary da bul jerge jarasa qalǵan.

Oblys ortalyǵynan qol sozym jerde, 17 shaqyrym qashyqta ornalasqan Korıakov kóli Pavlodar aýdanynyń aýmaǵyna qaraıdy.

Korıakovka jáne Kemeńger eldi mekenderine jaqyn jerde oryn tepken. Kóldiń tabany tegis, soǵan sáıkes qar kóp túsken jáne jaýyn-shashyn mol bolǵan jyldary kemerine keledi.

Aýmaǵy 11 myń sharshy metrdeı bolatyn kóldiń tereńdigi 70 santımetrden aspaıdy.

Ekologterdiń aıtýynsha, onyń tabanynda jatqan tuz qabatynyń qalyńdyǵy 42 santımetrden 76 santımetrge deıin ózgerip otyrady eken.

Byltyr táýelsiz ekologter kóldiń sýy óte taıazdanyp, burynǵy qyzǵylt reńkinen ajyrap bara jatqanyn habarlaǵan edi.

Buǵan qosa jergilikti aýyl turǵyndary ondaǵy tuzdy retsiz paıdalanyp, tabıǵı baılyqty úılerine tasıtyny taǵy bar.

Sol ýaqytta óńirlik jer qoınaýyn paıdalaný, qorshaǵan orta jáne sý resýrstary basqarmasynyń mamandary jýyqta kólge barlaý jumystaryn júrgizip, oǵan sonshalyqty qater tónip turǵan joq degen qorytyndyǵa keldi.

«Korıakovka aýylynyń mańyndaǵy qyzǵylt kóldiń jaǵdaıy Pavlodar oblysynyń ǵana emes, el turǵyndaryn da alańdatyp otyrǵanyn jaqsy bilemiz. Ekologııa jáne tabıǵı resýrstar mınıstri bastaǵan arnaıy komıssııa kóldegi jaǵdaıdy óz kózimen kórdi. Jaz Pavlodar oblysynda asa qurǵaq ótkeni málim. Komıssııa qurǵaqshylyq saldarynan sý qoımasy taıazdanyp ketken degen qorytyndy jasap otyr. Korıakov kóli mundaı jaǵdaıǵa buryndary da tap bolǵan. Mysal úshin Pavlodardaǵy mýzeılerdiń birinde kóldiń osydan 120 jyl burynǵy fotosýreti saqtalǵan. Onda sý aıdynynyń múlde qurǵap turǵanyn, monolıtti tuz qabatymen jabylǵanyn kórýge bolady», — deıdi óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Áıgerim Qabyltaeva.

Atap óterligi, 2020 jyldan beri «Mýltıservıs» kompanııasy Korıakovtan tuz óndirip keledi.

Osydan 5 jyl buryn qyzǵylt kól zerttelip, ǵalymdar sý aıdyny artemııa qurtyn ósirýge qolaısyz degen baılam jasaǵan.

Sondyqtan ol tek as tuzyn óndiretin oryn retinde ǵana paıdalanylady. Kólde shamamen 1 mln 773 myń tonnadaı tuz qory jınaqtalǵan.

QR Parlamenti Májilisiniń depýtaty Vera Kım Kemeńger aýylynda aýyl jastarymen kezdesip, atalǵan máseleni tıisti organdarǵa jetkizetinin ýáde etti.