Pavlodarlyqtan 400-den astam ártúrli mobıldi operatorlardyń SIM-kartasy tabyldy

ASTANA. KAZINFORM — Pavlodar qalasynda ınternet-alaıaqtyqty uıymdastyrý úshin qoldanylatyn qural-jabdyqtar tárkilendi.

Quqyq buzýǵa qarsy áreket etý jáne frod-qońyraýlar jasaý arqyly jasalatyn qylmystardy tergeý boıynsha ózara is-qımyl jáne yntymaqtastyq jónindegi memorandým sheńberinde, «Qazaqtelekom» AQ, «Ksell» AQ, Pavlodar oblysy polıtsııa departamenti jáne oblys prokýratýrasynyń úılestirýimen jedel sharalar barysynda Pavlodar qalasynyń turǵyny ınternet-alaıaqtyqqa qatysy bar bolǵany úshin ustaldy.

- Kúdiktiniń páterin tintý kezinde 5 SIM-box qurylǵysy (SIM-kartalardy qosý jáne olardy shetelde qashyqtan paıdalanýǵa arnalǵan jabdyq), 400-den astam ártúrli mobıldi operatorlardyń SIM-kartalary, roýterler jáne uıaly telefondar tabyldy, - delingen Pavlodar oblysynyń prokýratýrasy habarlamasynda.

Kúdiktige qatysty Qylmystyq kodekstiń 213-babyna sáıkes «uıaly baılanystyń abonenttik qurylǵysynyń sáıkestendirý kodyn, abonentti sáıkestendirý qurylǵysyn quqyqqa syıymsyz ózgertý, sondaı-aq abonenttik qurylǵynyń sáıkestendirý kodyn ózgertýge arnalǵan baǵdarlamalardy jasaý, paıdalaný, taratý» boıynsha sotqa deıingi tergeý bastaldy.

Qazirgi ýaqytta kúdikti qamaqqa alyndy, tergeý amaldary júrgizilip jatyr.

QPK-niń 201-babyna sáıkes tergeý múddesi úshin ózge aqparat jarııa etilmeıdi.