Pavlodarlyq jasóspirim eshki ósirip, sútinen tabys taýyp otyr
PAVLODAR. KAZINFORM — Tımýr Rústemov óz betimen eshki sharýashylyǵyn quryp, saýylǵan sútti óńdeýmen aınalysady. Kúnine 20-30 lıtr eshki sútin saýyp, odan irimshik pen ıogýrt, súzbe ázirlep satady.
Tımýr Pavlodar qalasynyń irgesindegi Mıchýrın aýylynda turady. Bala shaqtan malsaq bolyp ósken jasóspirimniń ózi úshin tańsyq — eshki ósirý isin qolǵa alǵanyna 3-4 jyldaı ýaqyt bolǵan.
Búginde jas fermerdiń ónimin satyp alýshylardyń aldy kádimgideı qalyptasyp qalǵan kórinedi.
Kishkene kezinen úı janýarlaryna úıirsek ekenin baıqaǵan ákesi Jasulan balasyn mal sharýashylyǵyna baýlý kerek ekenin erte túsindim deıdi.
— Osydan tórt jyl buryn bolýy kerek, ákem Tımýrǵa qulyn syılady. Balam onyń aınalasynan shyqpaı qoıdy. Keıin Mıchýrınde «Jas tulpar» atty kempıng quryp, kelýshilerge jylqyǵa minip serýendep qyzmetin usyna bastadym. Baıqaımyn, bul kásipti kórgen Tımýr de izdenip, óz aldyna bir is bastamaqqa árekettenip júr. Bir kúni sıyr ósirýdiń shyǵynyn, onyń sútinen túsetin tabysty eseptep otyr. Zeńgi baba tuqymyn ustaý, ony jem-shóppen qamtamasyz etý asa qymbatqa túsetinin túsindirdim. Ári maldyń da maly bolady. Ony jaılaımyn dep júrip oqystan jas balaǵa tuıaǵy tıip kete me dep júreksindim. Sondyqtan eshkiden basta degen usynys aıtty, — deıdi Jasulan Rústemov.
Eshki jaryqtyq ósimtal janýar. Ózge túlikke qaraǵanda tez kóbeıip, kez kelgen jaǵdaıǵa beıimdelip ketedi. Azyqty da kóp talǵaı bermeıdi.
Jońyshqa, suly, arpa, túrli shóp qospasyn jáne sábiz ben qyzylsha berseń jetkilikti. Onyń ústine eshki sútiniń maılylyǵy 4,6 — 9 paıyz. Quramy jaǵynan ana sútine jaqyn, asqazan aýrýlaryna, allergııaǵa qarsy taptyrmas em.
Tımýr ǵalamtordan eshki baǵýdyń qyr-syryn, odan sút saýyp, óńdeý joldaryn úırenip alady. Eshkiniń «zaanen» tuqymy sútti ári tez kóbeıgish keledi eken. Tańdaý soǵan túsipti. Sóıtip ákesi men uly alǵashynda tórt bas urǵashy eshki men bir tekeni Petropavl qalasynan satyp ákeledi.
2022 jyly kóktemde oǵan qora-jaı turǵyzyp, eshki saýatyn oryn ázirleıdi. Zaanen eshkileriniń baǵasy qymbattaý bolady eken. Onyń ereksheligi sútinde. Bir eshki úsh-tórt lıtr sút beredi. Sonymen qatar, egizdep tóldeıdi. Jalpy eshki súti júrektiń jumysyna jaqsy áser etedi deıdi mamandar.
V2 jáne V12 dárýmenderine, amınqyshqyldarǵa baı, búırek pen baýyrdyń jumysyn rettep, holesterınniń deńgeıin túsiredi. Sıyr men eshki sútinen jasalǵan ónimder quramy jaǵynan uqsas bolǵanymen, eshki sútinen daıyndalǵan taǵamdar jyldam ári tolyq qorytylady.
Aǵzany aqýyzben baıytady, sol sebepti emshektegi sábılerge jáne qatty aýyrǵan syrqattarǵa beredi. Eshkiniń eti de jeńil.
Áýel basta bıznes ıdeıasyn oılastyrǵanda jas fermer zaanen eshkileri beretin súttiń ıissiz keletinin ári odan irimshik jasaýǵa bolatynyn negizge alypty. ıAǵnı sútti jas balalarǵa da berýge bolady.
Qazaqstanda damı qoımaǵan eshki sharýashylyǵyn Kereký jerinde órkendetsem degen bala armany búginde aqıqatqa aınalyp úlgerdi. Qazir Tımýrdiń sharýashylyǵynda 48 eshki bar.
— Janýarlarǵa erekshe kútim kerek. Olarǵa túrli aýrýlardyń aldyn alatyn ekpe jasatyp, dárýmender beremin. Erkeletkendi jaqsy kóredi. Únemi sylap-sıpap júrseń, sútti de jaqsy beredi eken. Tańerteń erte turyp, áýeli olardyń aldyna jemshóbin jetkizemin. Al sabaqtan kelgen soń saýylǵan sútten irimshik pen jumsaq súzbe daıyndaımyn. Instagramda paraqsha ashqanmyn, adamdar sol jerden tapsyrys berip jatady. Onlaın-tapsyrystardy ýaqytyly oryndaýǵa tyrysamyn, — deıdi jas kásipker.
Tımýr — otbasyndaǵy eki balanyń úlkeni. Óz kásibine muqııat qarap otyrǵan jasóspirim qazirgi kúni Pavlodardaǵy № 16 mektep-lıtseıinde 10-synypta bilim alyp júr.
Ákesi Jasulannyń oıynsha, jas urpaqtyń barlyǵy IT-mamandyqty nemese aqparattyq salaǵa qajet kásipti tańdaýy mindetti emes. Aýyl sharýashylyǵyna da bolashaq kadrlar qajet. Sondyqtan ulyń bul baǵytqa qazirden baýlyp júr.