Pavlodarlyq volonterler sý tasqynynan zardap shekken aýyldarǵa kómektesip júr
PAVLODAR. KAZINFORM — Qazaqstannyń Qyzyl Jarty Aı qoǵamynyń jergilikti ókilderi búginge deıin aýyl halqyna 1 tonnadan astam gýmanıtarlyq kómek jetkizgen. Volonterler qıyn jaǵdaıda qalǵan turǵyndardy jylytqysh quraldarmen, jyly kıim, etikpen, kórpemen qamtamasyz etip jatyr.
Qyzyl Jarty Aı qoǵamynyń Pavlodar óńirlik fılıalynyń dırektory Gúlnar Isakanova eriktiler naýryz aıynyń sońynan beri qarǵyn sýdan zardap shekken aýyldardy aralap, kómek kórsetip jatqanyn aıtty.
— Buǵan deıin bizdiń volonterler Ýspen, Aqtoǵaı, Ertis aýdandaryndaǵy sý basqan aýyldarǵa bardy. Biz Ýspen aýyly men Aqtoǵaıdyń Jalaýly aýylyndaǵy topan sý ortasynda qalǵan úılerdi aralap, qarǵyn sýdan kelgen zııandy óz tarapymyzdan baǵaladyq. Adamdarǵa jyly kórpeler men jylytqyshtar, etikter, jyly kıimder tarattyq. Jalaýly aýylynda 14 úıdi sý basqan eken. Ondaǵy 3-4 úı bos tur, otbasy músheleri ózge jerge ornalasqan. Qalǵandaryna gýmanıtarlyq kómek kórsettik. Turǵyndarǵa jyly kúrtesheler, etikter, jylytqyshtar berdik. Jalpy salmaǵy 200 kg bolatyn gýmanıtarlyq kómek kórsetildi. Budan bólek, keshe Ertis pen Aqqýly aýdandarynyń árqaısysyna 300-400 kg gýmanıtarlyq kómek jóneltildi, -dep habarlady fılıal jetekshisi.
Qoǵam ókilderi jaqyn kúnderi óz seriktesterinen taǵy 5 tonnadaı kómek keletinin, onyń deni kıim-keshek ekenin aıtady.
Bul kómekti Tereńkól, Ýspen, Jelezın, Maı aýdandaryna jiberý josparda tur.
G.Isakanovanyń sózinshe, sý basqan aýyldarǵa volonterlerdiń turaqty kómeginiń qajet joq.
Sondyqtan olar turǵyndardyń kúndelikti ómirine qajet zattar men buıymdardy jetkizip jatyr.
Búginde Pavlodar oblysy boıynsha Qyzyl Jarty Aı qoǵamynyń 10 ókili jumys istep jatyr.
