Pavlodarlyq turǵyn burynǵy súıiktisin tonap ketti

PAVLODAR. KAZINFORM -  Áıel adamnyń úıinen joǵalǵan zattardyń jalpy quny 1 mln teńgeden asqan. Súıiktisi ol buıymdardy lombardqa tapsyryp úlgergen.

Pavlodarlyq tártip saqshylary urlyq jasady degen kúdikpen 50 jastaǵy er azamatty ustady. Ol buǵan deıin páterinde birge turǵan áıeldiń úıine jasyryn kirip, qymbat zattaryn oljalap ketken.

- Er adam buryn áıeldiń páterinde birge turǵan, qaltasynda qosymsha kilti bolǵan. Páter ıesiniń jumysqa ketkenin paıdalanyp, úıdi óz kiltimen ashyp kirgen. Sóıtip kúzen ishikti, qos jup altyn syrǵany jáne shotland vıskıin urlap ketken. Іshik pen altyn buıymdardy lombardqa ótkizip jibergen. Keltirilgen shyǵyn kólemi 1 mln teńgeden asyp otyr, - dep habarlady Pavlodar oblysy polıtsııa departamentiniń baspasóz qyzmetinen.

Kúdiktige qatysty sotqa deıin tergeý sharalary bastaldy. Eshqaıda shyqpaý týraly qolhat alynyp, zattaı dáleldemeler tárkilendi. Polıtsııa kúdiktiniń osyǵan uqsas ózge qylmystarǵa qatysy bar-joǵyn tekserýde.