Pavlodarlyq til janashyry psıhıkalyq naýqastardy emdeıtin mekemeden shyǵaryldy

PAVLODAR. KAZINFORM - Til janashyry, qoǵam belsendisi Rýza Beısenbaıtegi psıhıatrııalyq emhanadan shyqty. Kesheden beri bul jańalyq qazaq tildi qoǵam arasynda úlken dúrligis týyndatqan edi.

Rýza Beısenbaıteginiń psıhıkalyq naýqastardy emdeıtin mekemeden bosatylǵany týraly alǵashqy bolyp Pavlodar oblystyq máslıhatynyń depýtaty Asylbek Týǵanbaı málimdedi.

«Kesheli beri kóziqaraqty jurtshylyq pavlodarlyq belsendi, til janashyry Rýza Beısenbaıteginiń jaǵdaıyna alańdaýly bolǵany túsinikti. Dál qazir Rýza apaı psıhıatrııalyq emhanadan bosatyldy. Jaǵdaıy jaqsy. Ol kisige qatysty máselege barlyǵymyz alańdadyq. Shamamyz kelgenshe naqty aqparat alyp otyrýǵa tyrystyq. Quzyrly mekemelermen únemi baılanysta boldyq. Ár óńirden qanshama adam habarlasty. Barsha janashyr aǵaıynǵa alǵys bildiremiz», - dep habarlady Asylbek Týǵanbaı.

R.Beısenbaıteginiń mekemeden shyǵarylǵany týraly aqpardy oblystyq densaýlyq saqtaý basqarmasynyń baspasóz qyzmeti rastady.

«Ortalyq dárigerleri tarapynan naýqasqa eki kún boıy em qabyldaý sharalary jasaldy. Medıtsına qyzmetkerleriniń qaraýynan keıin densaýlyq jaǵdaıynyń jaqsarýyna oraı, konsılıým sheshimimen naýqas dıspanserlik baqylaý usynysymen úıine qaıtaryldy.
Densaýlyq saqtaý salasyndaǵy zańnamaǵa sáıkes, aldaǵy ýaqytta naýqastyń psıhıkalyq aýytqýlary nasharlap, aınalasyndaǵy adamdarǵa zııan keltirý yqtımaldyǵy qaıta baıqalǵan jaǵdaıda, ol emdeýge jiberiletin bolady» dep jazylǵan basqarmanyń resmı habarlamasynda.

Eske sala keteıik, keshe Pavlodarlyq til janashyry psıhıkalyq naýqastardy emdeıtin mekemege jatqyzyldy.