Pavlodarlyq temirjolshylardy qaraýsyz maldyń poıyzdarǵa jıi soqtyǵysýy alańdatyp otyr
PAVLODAR. KAZINFORM - Jyl basynan beri temirjolǵa shyǵyp ketken úı janýarlarynyń kesirinen poıyzdardyń 70-ten astam shuǵyl tejelýi tirkelgen. Onyń úshten birinde soqtyǵysý derekteri anyqtalǵan.
Magıstraldyq jelilerdiń Pavlodar bólimshesi habarlaǵandaı, Aqsý – Degeleń, Toqybaı – Úshqulyn – Aqbıdaıyq, Pavlodar – Ereımentaý jáne Pavlodar – Qurǵamys ýchaskeleri eń problemaly aımaqtar bolyp otyr. Bul jerlerde qaraýsyz júrgen tórt túlik únemi temirjolǵa shyǵyp ketedi. Bul poıyzdardyń keshigýine, lokomotıvterdiń zaqymdanýyna jáne janýarlardyń ólimine ákep soǵady.
- Sońǵy alty aıda temirjoldaǵy maldyń kesirinen 74 shuǵyl tejelý jaǵdaıy tirkeldi. 27 jaǵdaıda soqtyǵysýdyń aldyn alý múmkin bolmady. Osyndaı árbir oqıǵadan keıin poıyzdy toqtatyp, quramdy tekserýge týra keledi. Al bul óte kóp ýaqytty alady, - deıdi Pavlodar temirjol bólimshesiniń bas ınjeneri Aıdar Hamzabaev.
Temirjolshylar bul máselemen kúresýge tyrysyp jatyr. Halyq arasynda túsindirý jumystaryn júrgizip, temirjolǵa jaqyn ornalasqan aýyldyq ákimdikter men sharýa qojalyqtaryna 106 hat joldaǵan. Alaıda ózekti jaıt áli sheshilmeı otyr.
Eske sala keteıik, Mańǵystaýda temirjol qyzmetkeri jumys ornynda kóz jumdy.
