Pavlodarlyq stýdentter sırek kezdesetin qus tuqymdarynyń 30-dan astamyn ósirgen

PAVLODAR. KAZINFORM — Pavlodar oblysyndaǵy «Ertis» Joǵary ınnovatsııalyq agrarlyq kolledjiniń stýdentteri «Brama», «Djersıı gıganty» jáne «Kýchınsk mereıtoılyq» tuqymyndaǵy 30-dan astam úı qusyn ósirip shyǵardy. Bul týraly Oqý-aǵartý mınıstrligi málim etti.

Jumyrtqany salý sátinen bastap embrıonnyń qalyptasýyna deıingi ınkýbatsııa úderisiniń barlyq kezeńderi stýdentterdiń tolyq baqylaýynda jáne ǵylymı baqylaýlarmen súıemeldenedi. Bul praktıkalyq oqytý kásipkerlik kózqarasqa negizdelip, stýdentterge oqý barysynda óz ıdeıalaryn iske asyrýǵa múmkindik beredi.

Agrarlyq tehnologııalardy ıgerý basqa baǵyttarda da jalǵasýda. Jýyrda bolashaq veterınarlar elimizdegi eń ónimdi etti iri qara tuqymdarynyń biri sanalatyn qazaqtyń aqbas sıyryn qoldan uryqtandyrý jumysyn sátti júzege asyrdy.

— Mundaı praktıkaǵa negizdelgen sabaqtar stýdentterdiń kásibı quzyretterin arttyryp, óz betinshe sheshim qabyldaý daǵdylaryn qalyptastyrady, sondaı-aq bilikti mamandardy daıyndaýǵa múmkindik beredi, — deıdi kolledj dırektory Aıgúl Baıjumanova.

Bul bastamalar 2025–2027 jyldarǵa arnalǵan tehnıkalyq jáne kásiptik bilim berýdi transformatsııalaý jónindegi Jol kartasy aıasynda qoldaý tabýda. Kolledjder bazasynda stýdentterdiń kásipkerlik bastamalaryn qoldaýǵa arnalǵan «Business Startup» ortalyqtary qurylyp jatyr.

Aıta keteıik, elimiz boıynsha kolledj stýdentteri 700-den astam startap-joba men bıznes-ıdealardy júzege asyrýda. Bul jobalarǵa sýarý júıeleri, ekologııalyq sheshimder, IT ónimderi jáne basqa da salalar kiredi.

Buǵan deıin habarlanǵandaı, «Keleshek mektepteri» jobasy aıasynda 200 myńnan astam oqýshy orny paıdalanýǵa berilmek.