Pavlodarlyq stýdentter KAZ Minerals Tobynyń grantyna ıe boldy
PAVLODAR. KAZINFORM - 2024 jyly KAZ Minerals Toby Pavlodar óńiriniń abıtýrıentteri úshin 20 grant bóldi. Tegin orynnyń altaýy hımııa-mehanıkalyq kolledj stýdentterine berilse , qalǵan 14-i joǵary oqý oryndaryna arnalǵan bolatyn. Kazinform tilshisi grant ıelerimen áńgimelesip, taý-ken óndirýshi kompanııanyń esebinen bilim alý talaptarymen tanysty.
Lılııa Veşýnova – KAZ Minerals bólgen grant ıeleriniń biri. Boıjetken burynnan óziniń 9-synyptan keıin tehnıkalyq bilim alý úshin kolledjge oqýǵa túsetinin biletin.
«Ata-anamnyń keńesinen keıin kompanııanyń grantyna qujat tapsyrý men úshin maqsat boldy. Bizdiń otbasy taý-ken isin jaqsy biledi. Ógeı ákem Bozshakól ken ornynda jumys istegen, al anam metallýrgııa kolledjinde oqyǵan», - deıdi Pavlodar hımııa-mehanıkalyq kolledjiniń birinshi kýrs stýdenti Lılııa Veşýnova.
Lılııadan basqa taǵy tórt stýdent qyz qajetti ball jınap, KAZ Minerals ókilderimen suhbattan sátti ótkennen keıin pavlodarlyq kolledjde «laborant» mamandyǵy boıynsha oqýlaryn bastap ketti.
«Konkýrs ótinishterdi qarastyrý jáne úmitkerlermen suhbattasý sekildi eki kezeńnen turdy. Bul jumystardy qurylymdyq bólimderdiń basshylary men mamandary, qyzmetkerlerdi oqytý jáne damytý bóliminiń basshysynan turatyn komıssııa atqardy. Suhbattyń qorytyndysynan keıin grant ıeleri anyqtaldy», - dep málimdedi KAZ Minerals Bozshakol qyzmetkerlerdi oqytý jáne damytý bóliminiń basshysy Nazym Muqasheva
Stýdentter dıplom alǵannan keıin qaıda baryp jumys isteıtinin biledi. Pavlodar oblysy Bozshakól taý-ken baıytý keshenindegi zerthanada úsh jyl jumys isteý – grant bólý kezindegi mindetti talaptardyń biri.
«KAZ Minerals esebinen tegin bilim alý múmkindigin aldymen ata-anam bildi. Kompanııa oqý aıaqtalǵannan keıin jaqsy jumys, yńǵaıly keste men joǵary jalaqy usynady. Qazir matematıka men fızıkadan qınalyp júrmin. Biraq maǵan oqý unaıdy», - deıdi stýdent Samal Temirova.
Kompanııa stýdentterdiń stıpendııasyn tóleıdi. Sonymen qatar kolledjdegi oqý bólmeleri muǵalimder maquldaǵan jabdyqtarmen jasaqtalyp jatyr.
«Qural-jabdyqtardyń qandaı tehnıkalyq talaptarǵa saı bolýy eskertilgen. Barlyǵyn qosqanda kolledjge jalpy quny 50 mıllıon teńge bolatyn qurylǵylar kelýge tıis. Biz naqty KAZ Minerals kompanııasyna qajet mamandardy daıyndap jatyrmyz. Abıtýrıentter men olardyń ata-analaryna arnalǵan aqparattandyrý jumystaryn júrgizemiz», - deıdi Pavlodar hımııa-mehanıkalyq kolledjiniń tájirıbe jetekshisi jáne arnaıy pán oqytýshysy Tatıana Gavrılıýk.
