Pavlodarlyq sot oryndaýshylary turǵyndarǵa qosarlanǵan aıyppul tóletip kelgen

PAVLODAR. KAZINFORM — Quqyqtyq statıstıka jáne arnaıy esepke alý jónindegi komıtetiniń Pavlodar oblysy boıynsha departamenti aıyppuldar úshin qosarlanǵan tólem faktileriniń jolyn kesti.

Ertis-Baıan óńirindegi jeke sot oryndaýshylary oblys turǵyndarynan qate ustalǵan 85 atqarýshylyq is júrgizý boıynsha 2 mln teńgeni qaıtaryp berdi.

— Departament qadaǵalaý qyzmeti barysynda májbúrlep oryndaýǵa joldanǵan ákimshilik aıyppul boıynsha qosarlanǵan tólem faktilerine jol berilgenin anyqtady. Mysaly, bankte qosymsha arqyly ákimshilik aıyppuldy óz betinshe tólegen Pavlodar qalasynyń turǵynynan (JSO-ǵa habarlamaı) boryshkerdiń banktik shotynan 36 920 teńge qaıta ustalǵan. Osylaısha, bir aıyppul eki ret tólengen, — dep habarlady Quqyqtyq statıstıka jáne arnaıy esepke alý jónindegi komıtetinen.

Qadaǵalaý organy atalǵan máseleni erekshe baqylaýǵa aldy, atalǵan jónsiz derekterge jol bermeý boıynsha barlyq qajetti shara qabyldanyp jatyr.

Eske sala keteıik, Pavlodarda 12 ákim ózderiniń ne úshin jazalanǵanyn túsine almaı otyr.