Pavlodarlyq soǵys ardageri 100 jasqa keldi
PAVLODAR. KAZINFORM - Ǵasyr jasaǵan qart maıdanger Sergeı Vyjýtovıch 18 jasynda maıdanǵa shaqyrylǵan. Soǵysta kórsetken erligi úshin II dárejeli Otan soǵysy ordenimen, kóptegen medalmen marapattalǵan.
Sergeı Nıkolaevıch 1926 jylǵy 20 shildede Reseıdiń Novosibir oblysy Chanov aýdanyndaǵy Zem-Zaımka aýylynda dúnıege kelgen. 1944 jyldyń qarasha aıynda 18 jasynda maıdanǵa shaqyrylyp, 2-shi Belarýs maıdanynyń 44-gvardııalyq atqyshtar dıvızııasy quramynda soǵysqa qatysty. Soǵys aıaqtalǵannan keıin Ýkraınada, keıin Rıga qalasyndaǵy avıatsııalyq polkte mehanık-radıst bolyp áskerı qyzmetin jalǵastyrady.
1951 jyly ásker qatarynan bosatylǵannan keıin qaıtadan merzimnen tys áskerı qyzmetke shaqyrylyp, 1956 jylǵa deıin Pavlodar qalasyndaǵy avıatsııalyq áskerı bólimde radıo jabdyqtary jónindegi mehanık bolyp qyzmet atqarady. Áskerı qyzmetin aıaqtaǵan soń 28 jyldan astam ýaqyt «Pavlodarpromstroı» qurylys basqarmasynda eńbek etti.
Pavlodar oblysynyń ákimi Asaıyn Baıhanov ardagerdi ǵasyrlyq mereıtoıymen quttyqtap, qarııanyń erligi, qaısarlyǵy jáne Otanǵa adal qyzmeti úshin alǵys bildirdi.
- Sergeı Nıkolaevıch - taǵdyry taǵylymdy jáne rýhy bıik jan. Ol - bizge beıbit ómir syılaǵan jeńimpaz urpaqtyń ókili. Erligińiz ben ónegeli ómir jolyńyz úshin Sizge zor alǵys aıtamyn. Qaısarlyǵyńyz jáne ómirge degen qushtarlyǵyńyz barshamyzǵa úlgi ári zor qurmetke laıyq. Sizge zor densaýlyq, amandyq jáne uzaq ǵumyr tileımin, - dedi óńir basshysy.
Eske sala keteıik, Gollıvýdta kınoǵa túsken tuńǵysh qazaq akteri 85 jasqa toldy.
