Pavlodarlyq sheneýnikter jetim jigitti úı kezeginen alyp tastaǵan

PAVLODAR. KAZINFORM — Jetimder úıinde tárbıelenip shyqqan azamat kámelet jasyna tolǵan soń Ekibastuzǵa baryp jumys istegen. Onyń sol jaqta ýaqytsha tirkelýine baılanysty jergilikti komıssııaǵa baspanaǵa turǵan kezeginiń kúshin joıyp tastaǵan.

Pavlodar oblysynyń mamandandyrylǵan aýdanaralyq ekonomıkalyq sotynda turǵyn úı kezeginen zańsyz shyǵaryp tastaý faktisi boıynsha sot isi qaraldy.

Belgili bolǵandaı, talap qoıýshy Pavlodar qalasynda 2009-2016 jyldar aralyǵynda jetim balalarǵa arnalǵan mektep-ınternatta tárbıelengen.

Sol kezeńde memlekettik turǵyn úı qorynan baspana alýǵa kezekke qoıylǵan. Kámeletke tolǵan soń Pavlodar qalasynda jaldamaly baspanada tura bastaıdy.

Al jumysqa turý úshin Ekibastuz qalasynda ýaqytsha tirkelgen. Biraq turaqty turǵylyqty jeri bolmaǵan.

Óz kezeginde Pavlodar qalalyq turǵyn úı komıssııasy talap qoıýshyny basqa eldi mekenge turaqty turýǵa ketýine baılanysty kezekten shyǵarý týraly sheshim qabyldaǵan.

«Sot sheshimimen talap qoıýshynyń turǵyn úı quqyǵy qalpyna keltirildi. Sebebi jumys orny boıynsha ýaqytsha tirkeýge turý azamattyń turaqty turǵylyqty jeri bolyp tabylmaıdy. Sot turǵynjaıǵa muqtaj dep tanylǵan jáne turǵynjaı alǵanǵa deıin esepke qoıylǵan jetim balalar men ata-anasynyń qamqorlyǵynsyz qalǵan balalar esepten shyǵarylyp tastalýǵa jatpaıtyndyqtan „Turǵyn úı qatynastary týraly“ zańnyń 73-baby 1-tarmaǵynyń normalaryn qoldanýdy oryndy jáne ádil dep sanady» dep habarlady Pavlodar oblystyq sotynyń baspasóz qyzmetinen.

Sot aktisi zańdy kúshine endi.

Eske sala keteıik, buǵan deıin alıment bereshegin azaıtyp kórsetken pavlodarlyq sot oryndaýshylary jazalanǵanyn jazǵan edik.