Pavlodarlyq sheneýnikter memleket bıýdjetine 480 mln teńgeden astam shyǵyn keltirgen
PAVLODAR. KAZINFORM — Prokýratýra keıingi úsh jylda salynǵan nysandarǵa taldaý júrgizip, birqatar zańbuzýshylyqty anyqtady. Sonyń saldarynan bıýdjetke 484 mln teńge kóleminde shyǵyn kelgen.
Tekserý barysynda Pavlodar oblysynyń qurylys basqarmasyndaǵy laýazymdy tulǵalar oryndalmaǵan jumystardy qabyldap, aqysyn tólegeni jáne ósimpul óndirip almaǵany anyqtaldy. Al merdigerler tıimsiz deldaldardyń qyzmetine júginip, qurylys materıaldary men jabdyqtardy arzan ári talapqa saı kelmeıtin túrlerine almastyrǵan.
Prokýrorlar naqty mysaldardy da keltirdi. Jobaǵa sáıkes, metall shatyr jabyndysynyń qalyńdyǵy 0,7 mıllımetr bolýǵa tıis edi. Alaıda is júzinde 0,5 mıllımetrlik materıal qoldanylǵan. Qabyrǵalar penopleks materıalymen qaptalýy kerek bolsa, onyń ornyna kádimgi penoplast paıdalanylǵan.
Sondaı-aq ambýlatorııalarda sertıfıkattalǵan medıtsınalyq shamdar ornatylýǵa tıis bolǵan. Alaıda prokýrorlar olardyń ornyna keńselerge arnalǵan qarapaıym LED-shamdardyń qoıylǵanyn anyqtady.
— Qurylys basqarmasynyń laýazymdy tulǵalary № 1 Pavlodar qalalyq aýrýhanaǵa montajdalmaǵan jáne iske qosylmaǵan jabdyqtardy zańsyz qabyldaǵan. Operatsııalyq bloktardyń bir bóligi is júzinde paıdalanýǵa daıyn bolmaǵan. Qymbat medıtsınalyq jabdyqtar qaptamasynan shyǵarylmaǵan, al óndiristik lıftiler men jeldetý júıesi paıdalanýǵa ázirlenbegen, — deıdi Pavlodar oblystyq prokýratýrasynyń prokýror kómekshisi Ádil Jumabekov.
Osylaısha, qurylys basqarmasy qyzmetkerleriniń áreketinen memleket bıýdjetine 480 mln teńgeden astam shyǵyn kelgen. Qazirgi ýaqytta árbir derek jeke qaralyp jatyr. Atap aıtqanda, ákimshilik jáne qylmystyq ister qozǵalǵan.
Óz kezeginde Pavlodar oblystyq qurylys basqarmasy basshysynyń orynbasary Azat Satabaev barlyq eskertý qabyldanyp, olardy joıý jumystary júrgizilip jatqanyn málimdedi.
— Barlyq eskertý qabyldandy, qazirgi ýaqytta olardy joıý jumystary júrgizilip jatyr. Kepildik mindettemeler aıasynda sot talqylaýy bastaldy. Qurylys basqarmasy boıynsha kepildik merzimi — 10 jyl. Osy kezeń ishinde kepildik mindettemelerin oryndatý úshin sotqa júginýge quqyǵymyz bar, — deıdi ol.
Aıta keteıik, tekserý jumystary medıtsınalyq nysandarǵa qatysty júrgizilgen. Jalpy óńirde jańadan salynǵan 30 ǵımarat tekserilgen.
Eske sala keteıik, Pavlodarda ákimdik qarjysyna jóndelgen úıler kógerip ketti.