Pavlodarlyq «SAMIYAN» kvınteti Túrkııadaǵy óner baıqaýynda gran-prıge ıe boldy
PAVLODAR. KAZINFORM — Túrkııanyń aıdyndy Alanııa qalasynda ótken V Halyqaralyq «Global Art Competition» baıqaýy qazaq óneriniń mereıin taǵy bir márte ústem etti. Ertis boıynan barǵan «SAMIYAN» erler vokaldyq kvınteti qazylar alqasynyń tańdaıyn qaqtyryp, bas júldege ıe boldy.
«SAMIYAN» erler vokaldyq kvınteti bul baıqaýdyń naǵyz jaýharyna aınaldy dese bolady. Mádına Nurǵojınovanyń jetekshiligimen óner kórsetken ujym repertýarynyń asa baı mánerimen erekshelengen.
— Abaı ánderiniń ózgeshe órneginen bastap, ıtalııalyq klassıkalyq týyndylardy («Amore scuzami», «Dicitencello vuie») qazaqy naqyshpen astastyra bilgen kvıntet jigitteriniń ónerine sheteldik mamandar joǵary baǵa berdi. Bizdiń sheteldik áriptesterimiz, óner salasynyń maıtalmandary kvıntettiń sátti qurylǵan ujym ekenin de atap ótti. Olar ujymnyń tarıhyna, shyǵarmashylyqtaryna qyzyǵýshylyq tanytty, — deıdi Pavlodar mýzykalyq kolledjiniń dırektory Serik Syzdyqov.
«SAMIYAN» kvınteti 2016 jyly qurylǵan. Ujym Pavlodar óńirindegi alǵashqy kásibı erler vokaldyq ansambli dese bolady.
Bul baıqaýda sondaı-aq Pavlodar mýzyka kolledjiniń stýdentteri — skrıpkashy Dana Ibraeva men qylqobyzshy Aıjanat Ábýbákir de gran-prı ıegeri atanyp qaıtty.
Eske sala keteıik, Túrki elderiniń jas ónertapqyshtary Astanada baq synap jatyr.
