Pavlodarlyq polıtseıler úsh kúnde kóshi-qon zańnamasyn buzýǵa qatysty 145 derek tirkedi
PAVLODAR. KAZINFORM - Kóshi-qon zańnamasyn buzǵan 7 shetel azamaty sot sheshimimen elden shyǵarylady. Taǵy bir sheteldik májbúrli túrde shekaradan ári asyryldy.
Óńirde «Mıgrant» jedel aldyn alý is-sharasy ótip jatyr. Polıtseıler sheteldik azamattar turatyn jerlerdi, qurylys nysandaryn, bazarlardy, uıymdardy jáne olardyń jaldamaly eńbegin paıdalanatyn jumys berýshilerdi tekseredi.
«Operatsııanyń alǵashqy úsh kúninde kóshi-qon zańnamasyn buzý boıynsha 145 jaıt anyqtaldy. 10 jumys berýshi sheteldik jumys kúshin zańsyz paıdalanǵany úshin jaýapqa tartyldy. Polıtsııaǵa sheteldikterdiń kelgeni týraly ýaqytyly habar bermegeni úshin 44 jeke jáne zańdy tulǵa jaýapqa tartyldy, jeti sheteldikti elden shyǵarý týraly sot sheshimi shyǵaryldy. Al taǵy bir sheteldik azamat májbúrli túrde shyǵaryp jiberildi», - dep habarlady Pavlodar oblysy Polıtsııa departamenti kóshi-qon qyzmetiniń bastyǵy Dáýlet Ysqaqov.
Sheteldikterdi jumysqa alǵanda el azamattarynyń kóbi ruqsat qujatyn resimdemeıdi. Mysaly, Pavlodar aýdany Olgın aýylyndaǵy sharýa qojalyǵy eńbek shartyn jasamastan Ózbekstan azamattaryn qurylysshy retinde jumysqa qabyldaǵan. Sheteldik jumys kúshin zańsyz paıdalanǵany úshin jumys berýshi de jazalandy.
Al Ertis aýdany Uzynsý aýylynyń aýmaǵynda zańsyz turyp jatqan 50 jastaǵy áıel anyqtaldy. Dál osy aýdanda kórshi memlekettiń azamaty esh ruqsatsyz satýshy bolyp jumys istep kelgen. Barlyq quqyq buzýshylar jaýapqa tartyldy, sot sheshimimen árqaısysyna 25 AEK mólsherinde aıyppul salyndy.
