Pavlodarlyq polıtseıler ıisshil ıtterdiń kómegimen 80 qylmysty izin sýytpaı ashty
PAVLODAR. KAZINFORM - Óńirdegi 25 qylmystyq oqıǵa esirtkige qatysty bolǵan. Iisshil ıtter qylmyskerlerdi ustap qana qoımaı, qarý-jaraq pen esirtki qoımalaryn izdep tapqan.
Pavlodar oblysy polıtsııa departamentiniń kınologııalyq qyzmet ortalyǵy qylmysqa qarsy kúreste qyzmettik-izdestirý ıtterin saýatty jáne barynsha tıimdi paıdalanyp otyr. Qyzmettik ıtter qoǵamdyq tártiptiń saqtalýyna qatysyp, qylmyskerlerdi ustaý, qarý-jaraq pen esirtki qoımalaryn izdeý is-sharalaryna jumyldyrylady.
«Qazirgi ýaqytta ortalyqta 28 ıisshil ıt qyzmet atqarady. Ár ıttiń óz mindeti bar. Aqyldy janýarlar izdestirý jumystarynan bólek, esirtki, jarylǵysh zattardy izdeýge mamandanǵan, polıtseılermen birge oblys ortalyǵynyń kóshelerin patrýldeıdi. Kún saıyn polıtsııaǵa túrli shaqyrýlar kelip túsedi. Kóbi urlyq, tonaý, adamdardyń joǵalýyna qatysty. Bizdiń qyzmetkerler dereý oqıǵa ornyna baryp, ıisshil ıttermen qylmyskerdi jedel tabýǵa tyrysady. Olar da adam sııaqty bárin sezedi, óziniń qyzmettik mindetin tolyqtaı oryndaǵansha kádimgideı ýaıymǵa salynady», - deıdi kınologııalyq qyzmet ortalyǵynyń bastyǵy Nııaz Valıev.
Jyl basynan qyzmettik ıtterdi paıdalana otyryp, 80 qylmys ashylǵan. Onyń ishinde 25 oqıǵa esirtki jelisine qatysty bolǵan. Mysaly, Metel esimdi batyl kómekshi esirtkini kez kelgen jerden taba alady.
Mamandardyń aıtýynsha, eger adam ıtterdi shynymen unatpasa, olarmen tolyq jumys isteı almaıdy. Janýarlardy komandalardy oryndaýǵa úırete alǵanymen arasynda baılanys bolmaıdy. Al kınolog pen ıt – bir komanda. Olar bir-birin túsinip, sezinýi kerek.
Eske sala keteıik, Pavlodarda balalardy basynan kastrıýlmen urǵan tárbıeshige qylmystyq is qozǵaldy.
