Pavlodarlyq podpolkovnık sottalýshyny uzaq ýaqyt bopsalap, para alyp kelgen
PAVLODAR. KAZINFORM - Pavlodarda qylmystyq-atqarý júıesiniń laýazymdy tulǵasy sottalýshyny bopsalap, uzaq ýaqyt aqsha alyp kelgeni áshkere boldy. Al jazasyn óteýshi azamat túrme bastyǵymen kórshiles kabınette qalaǵanynsha turyp, tipti qonaq shaqyrǵan.
Podpolkovnık qurǵan tuzaq
Oblystyq qylmystyq atqarý júıesi departamentiniń asa mańyzdy ister jónindegi jedel toptyń aǵa jedel ýákili A.Adrıshev 2023-2025 jyldary óz qyzmet babyn paıdalanyp, «№45 mekeme» RMM-de jazasyn ótep jatqan R.Beksultanovty bopsalaý arqyly qomaqty kólemde para alyp otyrǵan.
Pavlodar qalasynyń qylmystyq ister jónindegi aýdanaralyq sotynyń 2025 jylǵy 2 qyrkúıektegi sheshiminde aıtylǵandaı, sottalýshy R.Beksultanov 45 túzeý mekemesinde jazasyn óteý ýaqytynda podpolkovnık A.Adrıshevtiń qyryna ilikken. 2023 jyldyń basynda aǵa jedel ýákil túrmege kelip tekseris júrgizgende atalǵan sottalýshynyń jazany óteý rejimin buzǵanyn anyqtaıdy. Odan soń R.Beksultanovty shaqyryp alyp, ony qatańdatylǵan rejimdegi mekemege aýystyramyn dep qorqytady. Sózin «dáleldi etip» kórsetý úshin podpolkovnık tipti qujat jobasyn qoldan jasaǵan.
«Qysqasy basqa mekemege aýyspaımyn deseń, tóleısiń» degen talap qoıady.
«Bastyǵymnyń týǵan kúnine - 500 myń teńge»
«Sot kabınetindegi» málimetterge súıensek, 2024 jyldyń shilde aıynda A.Adrıshev oblys ortalyǵyndaǵy saýda úıleriniń birinen ózine jáne zaıybyna jalpy somasy 165 myń teńge turatyn kıim pen parfıým («Creed Absolu Aventus» parfıými – 40 myń teńge, «Bulgari» parfıými – 40 myń teńge, «Dolce&Gabanna» brendiniń shalbary – 50 myń teńge, «Armani Exchange» jeńsiz jeıdesi - 40 myń teńge) satyp alyp, onyń aqshasyn tap sol sátte telefonmen vıdeoqońyraý shalyp turyp sottalýshyǵa (aýdarymdy R.Beksultanovtyń áıeli jasaǵan) tóletken.
- A. Adrıshev jazasyn óteýshige moraldyq-psıhologııalyq qysym jasaýyn odan ári údete túsip, 2024 jyldyń qyrkúıek aıynda oǵan taǵy keledi. Pavlodar oblystyq qylmystyq-atqarý júıesi departamentiniń sol kezdegi bastyǵy M.Áshimovtiń týǵan kúni ekenin aıtyp, soǵan jınalý úshin 500 myń teńge kerek dep talap etedi. Ári ony mobıldi aýdarym arqyly týysynyń esep-shotyna jiberýdi usynǵan, - dep baıandalady sot sheshiminde.
Óziniń podpolkovnıkke kiriptar bolyp qalǵanyn, basqa amalynyń joqtyǵyn túsingen R. Beksultanov kelesi kúni óz áıeline habarlasý arqyly kórsetilgen nómirge 400 myń teńge, al taǵy bir sottalýshynyń áıeli arqyly 100 myń teńge jibergen. Sotta A.Adrıshev bul aqshany keıin M.Áshimovke syılyq retinde jibergenin, ony sottalýshy óz erkimen berdi dep aıtyp aqtalǵan.
Ol ol ma, 2024 jyldyń aqpan-shilde aralyǵynda atalǵan sottalýshy A. Adrıshevke 200 myń teńgeden 1 mıllıon teńgege deıingi somada aqsha berip otyrǵan. Bul qarajattardy podpolkovnık kelgen komıssııaǵa dastarhan jaıýǵa jáne M.Áshimovtiń qajettiligi úshin jumsadym dep jaýap bergen. Alaıda ol aqshanyń qaı kezeńderde alynǵanyn jáne somalaryn bilmeıtinin aıtqan.
Túrmeniń erkesine aınalǵan sottalýshy
Sottalýshy R. Beksultanov turaqty para berip turýdyń arqasynda mekemede jaman kúneltpegen. Ol tipti biraz ýaqyt mekeme bastyǵy otyratyn bólmeniń dál janynda ornalasqan jeke bólmede turyp, ózge sottalýshylardy emin-erkin qonaqqa shaqyryp otyrǵan.
- R. Beksultanovtyń 2025 jylǵy 9 qańtardaǵy sotqa deıingi tergeý barysynda kórsetken málimetteri boıynsha, sottalýshy 2022 jyldan bastap 2024 jyldy qosa alǵandaǵy kezeńde mekeme bastyǵy K. Koıchýbaevtyń ruqsatymen jedel bólim bastyǵynyń bólmesinde turǵan. Sonymen qatar, Koıchýbaevtyń ruqsaty boıynsha kir jýatyn bólmeni meken etip, bos ýaqytynda mekemeniń sport zalynda jattyǵyp, monshaǵa baryp, ákimshilik korpýsynyń ashanasynda dastarhan jaıyp kez kelgen sottalýshyny ózine qonaqqa shaqyra alǵan, - dep jazylǵan sot kabınetinde.
Sot qandaı sheshim shyǵardy?
Sot óńirlik qylmystyq-atqarý júıesiniń burynǵy qyzmetkeri A.Adrıshevti bopsalaý jolymen sottalýshydan para alyp turǵany úshin kináli dep tanyp, ony 7 jylǵa bas bostandyǵynan aıyrdy. Sondaı-aq sot sheshimimen «ádilet polkovnıgi» sheninen aırylyp, ómir boıyna memlekekettik qyzmetpen aınalysa almaıdy.
Buǵan deıin Pavlodarda sottalǵandar túrme shatyryndaǵy spýtnıktik ınternetti qoldanyp kelgeni týraly jazǵanbyz. Ol arqyly № 46 túzeý mekemesinde jazasyn ótep otyrǵandar ınternetke jáne kúzetshilerdiń beınekamerasyna qosylǵan.