«Baýyrlardy ajyratqymyz kelmedi»: pavlodarlyq otbasy tórt balany birdeı asyrap aldy
PAVLODAR. KAZINFORM — Bir búldirshinge pana bolýdy kózdep, Balalar úıine barǵan erli-zaıypty Qabyken men Elmıra Botabaı tórt balany birdeı asyrap alǵan. Otbasy búginde alys aýylda tatý-táti tirshilik keship jatyr.
Pavlodar oblysy Maı aýdanynyń Keńtúbek aýylynda Qabyken men Elmıra Botabaı kópbalaly otbasy bolyp turady. Úlken qyzdary turmysqa shyqqannan keıin, erli-zaıypty úıine ata-anasynyń qamqorlyǵynsyz qalǵan balalardy qabyldap, olarǵa tárbıe berip keledi.
— Úıimiz úlken. Bir kúni jubaıymyz ekeýimiz aqyldasyp otyryp: «Nege osy úıdiń jylýyn qorǵansyz qalǵan balalarmen bólispeske?» degen oıǵa keldik. Jasym elýdi alqymdap qalǵan kez, zaıybym ekeýimiz áli de jas balalardy baǵyp-qaǵatyndaı haldemiz. Sodan Elmıra ekeýimiz úmitkerler tizimine resmı tirkelip, psıhologııalyq daıyndyqtan óttik. Al 2024 jyly oblys ortalyǵynan qorǵansyz qalǵan súp-súıkimdi tórt jasar qyzdy taptyq, — dep eske aldy Qabyken Botabaı.
Olar Balalar úıine baryp, búldirshinmen tanysqan sátte kútpegen jaǵdaıǵa tap boldy. Kishkentaı Áseldiń ózimen birge mekemede júrgen eki aǵasy men bir baýyry bar eken. Baýyrlardy bir-birinen ajyratý — olardyń balalyq shaǵyna da, bolashaǵyna da aýyr soqqy bolaryn túsingen Qabyken men Elmıra Botabaılar sol jerde dereý sheshim qabyldap, tórt balany da baýyryna basty.
— Kópshilik bizden «Beıimdelý qıyn boldy ma?» dep jıi suraıdy. Shynymyzdy aıtsaq, Jaratqannyń qalaýymen bári óte tez ári jeńil ótti. Balalar bul úıde burynnan turyp júrgendeı birden úırenisip ketti. Úıimiz keń, barlyǵymyz emin-erkin syıystyq. Sol sátte biz úıdiń tórt qabyrǵasy emes, ishindegi shynaıy meıirim adamnyń ózin qaýipsiz sezinýi úshin mańyzdy ekenin túsindik, — deıdi Elmıra Botabaı.
Balalardyń úlkeni — Ádilbek búginde 11 jasta, Ramazan 10, Ásel alty, kenjesi Nursultan bes jasqa tolǵan. Ádilbek bıyl Ybyraı Altynsarın atyndaǵy daryndy balalarǵa arnalǵan oblystyq qazaq gımnazııa-ınternatynyń 5-synybyna qabyldansa, Áseli mektep tabaldyryǵyn attamaqshy. Qos úlken ul kúrespen shuǵyldanyp júr.
Otbasy músheleri baý-baqsha baptap, aýlany kórkeıtip otyr. Teledıdardan kórgen qyzyq ıdeıalardy aýla ishinde birge júzege asyrady. Baqshaǵa egilgen jemis aǵashtary balalarmen birge jetilip jatyr. Bos ýaqyttarynda Baıanaýyl óńirindegi saýyqtyrý lagerlerine baryp tynyǵady, veloserýender uıymdastyrady. Jolaı oblys ortalyǵyndaǵy oıyn-saýyq ortalyqtaryna soǵady, sýǵa shomylyp, mádenı oryndardy aralaıdy. Buǵan qosa, balalardy jyl saıyn Astana men Almaty sııaqty úlken qalalarǵa aparyp, saıahattaıdy.
— Osyndaı qarapaıym sátterde balalardyń júzindegi kúlkini kórgende erekshe qýanysh pen baqytqa bólenemiz. Jaqynda uldardyń bárin súndetke otyrǵyzdyq. Áselimizdiń qulaǵyn tesip, alǵashqy syrǵasy salyndy. Bul da otbasymyz úshin mańyzdy oqıǵa boldy. Barlyǵymyz syıý úshin salony keń avtokólik satyp aldyq. Endi baratyn jaǵymyzǵa qınalmaı jetemiz, — deıdi ata-ana.
Botabaı otbasynan qýanysh kúlkisi úzilmeıdi. Otaǵasy Qabyken — qoǵamdyq isterge belsene aralasatyn, kóp jyldyq tájirıbesi bar bilikti bapker. Qazir aýdandyq oqýshylar úıinde pedagog-uıymdastyrýshy bolyp jumys isteıdi. Kóp jyl «Maıtalman» qoǵamdyq uıymynyń tóraǵasy, aýdandyq máslıhattyń birneshe shaqyrylymyna depýtat boldy. Jergilikti balalardy kishkentaıynan sportqa baýlyp, olardyń boıynda tártip, jaýapkershilik, tózimdilik pen ózine degen senimdilikti qalyptastyryp júr.
Al Elmıra Botabaı otbasynyń jańa músheleri paıda bolǵaly burynǵy qyzmetinen shyǵyp, ózin tolyǵymen balalar tárbıesi men úı sharýasyna arnaǵan. Shańyraǵyna jylý syılap, árbir bala ózin súıikti, qaýipsiz ári qajet sezinetindeı aýan qura bildi. Balalardy eńbekke baýlýǵa erekshe mán berip, demalys kúnderi men jazǵy ýaqytty mazmundy ótkizýge tyrysady.
Qabyken Botabaıdyń ortanshy aǵasy dúnıeden ótkende onyń ulyn da osy otbasy qamqorlyqqa alǵan eken. Úlken aǵasynyń uly da osy shańyraqta erjetipti. Kenje uly Nursultannyń týǵaly bir aıaǵy ekinshisinen sál qysqa. Ony emdetýge otbasy bar kúshin salyp júr. Jaqynda ǵana Astanaǵa baryp, ońaltýdan ótip kelgen.
— Bala asyrap alýǵa qoryqpańyzdar! Biz úshin naǵyz baqyt — bir shańyraqtyń astynda jylýlyqty, qamqorlyqty jáne otbasylyq sezimdi birge bólisý, — dep túıindedi erli-zaıypty.
Eske salaıyq, buǵan deıin balaly otbasylarǵa qandaı tólemder qarastyrylǵanyn jazǵanbyz
