Pavlodarlyq ormanshylar jaraqattanyp qalǵan aqqýdy qutqardy

PAVLODAR. KAZINFORM — Belaıa ózeninde suńqyldaq aqqý tobyna jatatyn jas aqqý jaǵaǵa shyǵaryldy. Ol jaraqatyna baılanysty jyly jaqqa usha almaı qalǵan.

Ormanshylar jas aqqýdy kezekti patrýldeý kezinde baıqap qalǵan. Baqylaı kele, Belaıa ózeniniń pontondy kópir mańynda júzip júrgen qustyń usha almaıtynyn anyqtaǵan.

— Bul aqqý suńqyldaq túrine jatady, bıylǵy balapan ekeni baıqalady. Ormanshylar qaıyqpen sýǵa túsip, qusty jaǵaǵa shyǵaryp aldyq. Jaraqatyna baılanysty uzap júze almaıdy, ábden sharshaǵan. Oblys ortalyǵyna jaqyn jerdegi Pavlodar aýylynda qustar men janýarlarǵa arnalǵan arnaıy oryn bar. Jaraqattanyp qalǵan ań-qustar sonda ustalady. Aqqýdy sonda aparamyz, — deıdi oblystyq orman jáne janýarlar dúnıesin qorǵaý mekemesiniń basshysy Ajdar Júsipov.

Jas aqqý bıyl óńirimizdi qystap qalady. Ormanshylar ony qys boıy kútip, jaraqaty jazylsa kóktemde qaıtadan ózenge jiberedi.

Buǵan deıin qys jaqyndaı túskenine qaramastan Pavlodardaǵy Ýsolka ózeninde bir top aqqý júrgeni jaıly jazǵanbyz.