Pavlodarlyq oqýshylar men stýdentter erteń de qashyqtan oqıdy

PAVLODAR. KAZINFORM - Aýa raıynyń qolaısyzdyǵyna baılanysty 8 qarasha kúni Pavlodar qalasy boıynsha mektepterde sabaq qashyqtan ótkiziledi. Onlaın oqýǵa 0-11 synyptardyń oqýshylary, kolledjerdiń 1-2 kýrs stýdentteri aýystyrylady.

Pavlodar oblysy aýmaǵynda soǵyp turǵan surapyl jel tolastar emes. Aýa raıynyń qolaısyzdyǵyna baılanysty búgin oblystyń barlyq mektepterinde sabaq qashyqtan oqytýǵa aýystyrylǵanyn habarlaǵan bolatynbyz.

Al búgin keshkilik Pavlodar qalalyq bilim berý bólimi oqýshylar erteń de úılerinde oqıtynyn málimdedi.

«2024 jylǵy 8 qarasha kúni Pavlodar qalasy boıynsha aýa raıynyń qolaısyzdyǵyna baılanysty birinshi aýysymnyń 0-11 synyp oqýshylary, kolledjderde 1-2 kýrs (9-synyptan keıin túsken) stýdentteri qashyqtyqtan oqytý formatyna aýystyrylady», - dep habarlady bilim bóliminen.

Óńirde qazirgi ýaqytta 359 mektep jumys isteıdi. Bıylǵy oqý jylynda barlyǵy 118 myń oqýshy bilim alyp jatyr.

Buǵan deıin Pavlodarda surapyl jeldiń jyldamdyǵy sekýndyna 32 metrge deıin jetkeni týraly týraly jazǵan edik.

Al óńirlik tótenshe jaǵdaılar departamentiniń dereginshe 540 sharshy metr tóbe jabyny sógilip, jaryq óshýdiń 28 deregi tirkelgen.

Kúshti jel saldarynan ústine aǵash qulaǵan áıel jan tapsyrdy.

Oblys ákimdigi jekelegen aýmaqtarda tótenshe jaǵdaı rejımi jarııalanatynyn habarlady.