Pavlodarlyq oqýshylar bir tonnadan astam plastık qaqpaq jınady

PAVLODAR. KAZINFORM – Pavlodarlyq oqýshylar bir tonnadan astam plastık qaqpaq jınady. Bul týraly Pavlodar oblysynyń bilim berý basqarmasy málimdedi.

Ekologııalyq aktsııa sheńberinde jınalǵan qaqpaqtardan túsken qarajatty oqýshylar qaıyrymdylyqqa jumsamaqshy. 

Mıhaıla Kataev atyndaǵy oqýshylar saraıynda «EKO boom» jobasy sheńberinde  «Jaqsylyq jasa» atty aktsııa uıymdastyryldy. Oǵan 96 mektepten 12 615 oqýshy qatysty. 

Bıologııa ǵylymdarynyń magıstri Aıgerim Orazbaevanyń aıtýynsha, bir tonna plastık qoqys polıgonyna túspeýi úshin, balalar tabıǵatty aıalaýdy úırengen. 

— Oqýshylar plastık qaqpaqtardy jınaýǵa qyrkúıek aıynda kirisken. Ata-analary da atsalysqan.  Osy aktsııa úshin olar jınalǵan qaqpaqtardy plastık bótelkelerge salyp, mektepke ótkizýdi ádetke aınaldyrǵan, — dep tolyqtyrdy bıolog.

Keıinirek jınalǵan qaqpaqtardy qaıta óńdeıtin óndiris oryndaryna ótkizbekshi. 

Odan túsken qarjatty uıymdastyrýshylar qaıyrymdylyq qoryna aýdarý arqyly, shuǵyl emge muqtaj balalardyń emine jumsamaqshy. Byltyr oqýshylar 3 464 kg plastık qaqpaq jınap,  410 330 teńge alypty. Túsken aqsha aýyr naýqas eki balanyń emine jumsalǵan. 

Bıyl qaıyrymdylyq aktsııa Oqýshylar saraıynda 13 qyrkúıekte ótedi dep josparlanǵan.