Pavlodarlyq oqýshy respýblıkalyq olımpıadada top jardy
ASTANA. KAZINFORM — Pavlodar qalasyndaǵy № 38 jalpy orta bilim berý mektebiniń 7-synyp oqýshysy, lıtseı synybynda bilim alatyn Imran Qusanov respýblıkalyq aýyldyq ınformatıka olımpıadasynda 1-oryn ıelendi. Bul týraly Oqý-aǵartý mınıstrliginiń baspasóz qyzmeti habarlady.
Shákirt jetinshi synyp oqýshysy bola tura, 9-synyp oqýshylary arasynda synǵa túsip, mektep baǵdarlamasynan áldeqaıda joǵary bilim deńgeıin kórsetti.
Imran erte jastan kompıýterge, matematıkaǵa jáne tehnologııalarǵa qyzyǵýshylyq tanytqan. Ýaqyt óte kele ınformatıka pánine degen súıispenshilik ony jetistikke jetýge yntalandyrdy. Algorıtmdik esepterdi sheshý oǵan erekshe qyzyǵýshylyq syılaıdy, al olımpıadalarǵa qatysý onyń damýyna jáne kásibı ósýine yqpal etedi.
Respýblıkalyq ınformatıka olımpıadasy jyl saıyn elimizdiń eń úzdik oqýshylaryn biriktiredi. Qatysýshylarǵa algorıtmdik tapsyrmalar, derektermen jumys jáne baǵdarlamalyq sheshimder ázirleýdi qamtıtyn kúrdeli tapsyrmalar usynylady.
Sońǵy 2 jyl ishinde Imran qalalyq deńgeıden respýblıkalyq deńgeıge deıingi saıys jolynan ótti. Oqýshy qalalyq, oblystyq jáne respýblıkalyq olımpıadalarda sátti óner kórsetip, joǵary daıyndyq deńgeıin kórsetti.
— Olımpıadaǵa qatysý men úshin mańyzdy tájirıbe boldy. Ár kezeń maǵan jańa bilim berdi. Tapsyrmalar kúrdeli boldy, ásirese algorıtmderdi tereń túsinýdi jáne jyldam sheshim qabyldaýdy talap etetinder tapsyrmalar meni shyńdady. Degenmen dál osyndaı jarystar meniń damýyma yqpal etti. Men úshin eń mańyzdysy-ınformatıka páni muǵaliminiń jetekshiligimen atqarylǵan jumysymnyń joǵary nátıjege jetýi, — dedi Imran.
Imrannyń ınformatıkaǵa degen qyzyǵýshylyǵy onyń tálimgeri, ınformatıka pániniń muǵalimi Ertaı Soıannyń yqpalymen qalyptasty. Pedagog № 38 mektepte 2008 jyldan beri jumys isteıdi jáne 18 jyldyq eńbek ótili bar. Qyzyqty sabaqtar, jeke qoldaý men turaqty motıvatsııanyń arqasynda oqýshy algorıtmder men baǵdarlamalaý álemin tereń meńgerdi.
Aıta ketelik Qazaqstanda bıologııa men fızıkadan olımpıadanyń sheshýshi kezeńi bastalǵan edi.