Pavlodarlyq naýqas bala polıtseılerdiń arqasynda borandy túnde aýrýhanaǵa aman-esen jetkizildi

PAVLODAR. KAZINFORM — Oblystyq balalar aýrýhanasynda jasóspirimge shuǵyl ota jasaldy. Qazir densaýlyq jaǵdaıy birqalypty.

Sharbaqty aýdanynda 2014 jylǵy er bala kenetten ishi búrip, dene qyzýy kóterilip aýyrǵan.

Jergilikti aýrýhananyń kezekshi dárigeri naýqasty qarap, shuǵyl túrde Pavlodar qalasyna jóneltý kerek degen sheshim qabyldaǵan.

Bul túni óńirde qatty boran bolyp, avtojoldardyń barlyǵy jabylyp qalǵan edi.

«Túk kórinbeıtin boranda ýchaskelik polıtseı Talǵat Smaqov qyzmettik kóligimen jedel járdem mashınasyn aýdan shekarasyna deıin ilestirip aparǵan. Odan ári patrýldik polıtsııa qyzmetkerleri Arman Ábdýǵalıev pen Erǵanat Janǵazınov alyp júrgen. Tártip saqshylary sol túnde balany aman-esen oblystyq balalar aýrýhanasyna jetkizdi» dep habarlady óńirlik densaýlyq saqtaý basqarmasynyń baspasóz qyzmeti.

Dárigerler jasóspirimge shuǵyl ota jasap, ómirin saqtap qaldy.

Jansaqtaý bóliminde 3 táýlik jatqan soń qazirgi kúni hırýrgııalyq bólimshege shyǵarylǵan.

Er balanyń densaýlyǵy birqalypty, jaǵdaıy ońalyp keledi.