Pavlodarlyq mýzykanttar Italııanyń 7 qalasynda klassıkalyq mýzyka keshin ótkizip jatyr
Isa Baızaqov atyndaǵy Pavlodar oblystyq fılarmonııanyń sımfonııalyq orkestri rojdestvo meıramynda Italııanyń 7 qalasynda klassıkalyq mýzyka keshin ótkizýde, dep habarlaıdy Kazinform.
Otandastarymyz Italııa jáne Albanııa orkestrlerimen birge Jerorta teńizi jaǵalaýynda ornalasqan Kapýa, Sorrento, Benevento, Terrachına, Perýdja, Todı, Agerolla qalalarynda óner kórsetýde.
- Italııa halqy bul kúnderi rojdestolyq qysqy demalysta júr. Eýropa jurtyna tán mádenı, rýhanı is-sharalar bul kúnderi jıileı túsedi. Elder arasyndaǵy mádenı baılanys aıasynda ári halyqaralyq mýzykalyq tájirıe almasý maqsatynda óner saparymyz jalǵasyp jatyr. 2017 jyly dál osyndaı kontserttik keshterdi Rım, Mılan, Salerno jáne Appenın túbegindegi ózge de qalalarda ótkizgen edik, - deıdi Isa Baızaqov atyndaǵy óńirlik fılarmonııanyń basshysy, QR Mádenıet úzdigi Amangeldi Qojanov.
Jerorta teńizin jaǵalaǵan Italııa jurty otandyq jáne nemis klassıkalyq mýzykasyn aıryqsha unatady. Pavlodarlyq orkestr I.Shtraýs, I.Brams, J.Bıze, K.Sen-Sans, Rossını, Dj.Martýchıdiń týyndylarymen qosa, E.Rahmadıevtiń «Daırabaıyn» ár kontsertte oryndap júr.
Aıta keteıik, shyǵarmashylyq issapar 7 qańtarǵa deıin jalǵasady.
