Pavlodarlyq monopolıst elektr tarıfin bir jylda ekinshi ret kóterýge árekettenip otyr

PAVLODAR. KAZINFORM - «Pavlodarenergo» AQ oblys ortalyǵynyń tutynýshylary úshin elektr jaryǵynyń tarıfin 17,8 teńgeden 19,3 teńgege kóterýge ótinim berdi. Monopolıst bul ózgeriske júıelik operatordyń ulttyq elektr jelilerin paıdalaný tarıfteriniń qymbattaǵany, energııa taratý shyǵyndarynyń artýy men kásiporyn qyzmetkerleri jalaqysynyń ósýi sebep bolyp otyrǵanyn túsindirdi.

Pavlodar qalasynda «Pavlodarenergosbyt» JShS-niń elektr energııasy tarıfin ósirý týraly ótinimi boıynsha kópshilik tyńdaý ótti.

«Pavlodarenergo» AQ baspasóz qyzmeti habarlaǵandaı, jeke tulǵalar úshin tarıfti shamaman 2 teńgege, ıaǵnı 1 kVt/s úshin 17,8 teńgeden 19,3 teńgege ósirý kózdelgen. Zańdy tulǵalar úshin de tarıfti 2 teńgege ulǵaıtý josparlanǵan.

«Bul ózgeris júıelik operatordyń ulttyq elektr jelilerin paıdalaný tarıfterin qymbattatqany, energııa taratý shyǵyndarynyń artýy jáne kásiporyn qyzmetkerleri jalaqysynyń ósýi sebepti usynylyp otyr», - dep málimdedi monopolıst kompanııa.

Elektr taratýmen aınalysatyn kompanııa bıylǵy aqpan aıynda ǵana tarıf baǵasyn 3 teńgege, ıaǵnı 15,1 teńgeden 17,87 teńgege deıin ósirgen bolatyn. 

Tarıf boıynsha sońǵy sheshimdi Óńirlik tabıǵı monopolııalardy retteý departamenti qabyldaıdy.

Eske sala keteıik, Qazaqstanda kásipkerler úshin elektr energııasyna tarıfter tómendetildi.