Pavlodarlyq qutqarýshylar janyp jatqan úıden gaz balonyn alyp shyqty
PAVLODAR. KAZINFORM - Turǵyn úıdiń tóbe jabyndysy, jıhaz ben úı zattary órtke oranǵan. Jalyn jalpy aýmaǵy 120 sharshy metr jerdi sharpyp, kórshi turǵan úılerge qaýip tóndirgen.
Oqıǵa 31 qańtar kúni saǵat tańǵy bester shamasynda Pavlodar oblysy Ýspen aýdany ortalyǵynda bolǵan. №17 órt sóndirý bólimine Stepnaıa kóshesi, 11-úıdiń órtenip jatqany týraly habar túsip, qutqarýshylar jedel jetken.
«Órt shyqqan jerge jedel túrde kezekshi qaraýyl baǵyttaldy. Olar kelgende jeke turǵan gazoblokty úıdiń aǵash tóbesi, úı zattary jáne jıhazdar janyp jatqan. Órt sóndirý bóliminiń qutqarýshysy, azamattyq qorǵanys kishi serjanty Qaırat Aýsaǵıtov úıden 27 lıtrlik gaz balonyn ýaqytynda anyqtap, alyp shyqty. Qyzmetkerimiz kórsetken erliktiń nátıjesinde yqtımal jarylystyń aldyn aldyq ári órt kórshi úılerge taralǵan joq» dep habarlady óńirlik tótenshe jaǵdaılar departamentinen.
Oqıǵanyń jaı-japsary anyqtalyp, keltirilgen shyǵyn eseptelýde.
