Pavlodarlyq qutqarýshylar tikushaqtyń kómegimen áýede jattyǵý ótkizdi
PAVLODAR. KAZINFORM - Mundaı jattyǵýlardyń basty maqsaty – qutqarýshylardyń kásibı sheberligin arttyryp, kez kelgen jaǵdaıǵa daıyn bolýyn qamtamasyz etý.
Óńir qutqarýshylary áýede oqý-jattyǵý jumystaryn ótkizdi. Arnaıy tikushaqtyń qatysýymen ótken is-sharada mamandar tótenshe jaǵdaıda úılesimdi áreket etý daǵdylaryn shyńdady.
Jattyǵý barysynda qutqarýshylar birneshe kúrdeli jaǵdaıdy pysyqtady. Máselen, tikushaqtan tikeleı sý aıdynyna túsken súńgýirler sýǵa ketken adamdy qutqarý tásilderin kórsetti. Bul – tótenshe jaǵdaıda jedel kómek kórsetýge múmkindik beretin tıimdi ádis. Sonymen qatar mamandar izdestirý-qutqarý jumystaryn júrgizdi. Ásirese, jolmen jetý múmkin bolmaıtyn nemese qoljetimsiz aýmaqtarda kómek kórsetý amaldaryna basa nazar aýdaryldy.
- Búgingi jattyǵý óńirimizde alǵashqy ret bolyp jatyr. Biz jyl saıyn qyrkúıek aıynda ózge aımaqtardaǵy jarysqa qatysatynbyz. Biz qutqarýshy bolǵandyqtan ár jaǵdaıǵa daıyn bolýymyz kerek. Qutqarýshylar tikushaqtan oıdaǵydaı túsip, zardap shekken adamdardy der ýaqytynda qutqaryp aldy, - dep atap ótti Pavlodar oblysy Tótenshe jaǵdaılar departamenti jedel qutqarý jasaǵy basshysynyń orynbasary Serik Sherııazdanov.
Oblys boıynsha bıyl qutqarýshylardyń kómegimen 19 adam aman qalǵan. Tikushaqtyń artyqshylyǵy zor. Ol mamandardy oqıǵa ornyna tez ýaqytta jetkizip, qajetti kómekti der kezinde kórsetýge múmkindik beredi.
Eske sala keteıik, pavlodarlyq qutqarýshylar budan bylaı jaǵajaıdaǵy qaýipsizdikti dronmen baqylaıdy.