BUU Bas hatshysy: Afrıka «jańartylatyn energııa derjavasyna» aınala alady

ASTANA. KAZINFORM – BUU Bas hatshysy Antonıý Gýterrısh Japonııada ótken Afrıkanyń damýyna arnalǵan úsh kúndik konferentsııa barysynda Afrıka kontınentiniń «jańartylatyn energııa salasyndaǵy derjavaǵa» aınalýǵa barlyq alǵyshart bar ekenin málimdedi, dep habarlaıdy AZERTADJ. 

Onyń aıtýynsha, Afrıka kún men jel energııasyna baı, sonymen qatar jańa tehnologııalardy damytýǵa qajetti mańyzdy mıneraldyq resýrstarǵa ıe. Gýterrısh jasyl energetıkaǵa ınvestıtsııany arttyrýdyń mańyzdylyǵyn atap ótip, tabıǵı baılyqtar eń aldymen jergilikti halyqtyń ıgiligine jumys isteýi tıis ekenin jetkizdi.

Iokogamada ótken Afrıkanyń damýy jónindegi Tokıo halyqaralyq konferentsııasynda (TICAD) sóz sóılegen ol jasyl energetıkanyń elektr energııasynyń qunyn tómendetýge, jetkizý tizbegin ártaraptandyrýǵa jáne kómirtekti azaıtý protsesin jedeldetýge yqpal etetinin aıtty.

— Biz qarjy men tehnologııany jumyldyryp, búkil kontınent boıynsha jańartylatyn energııa men óndiristiń órkendeýine jol ashýymyz kerek, — dedi Bas hatshy.

Sondaı-aq ol «qaryz damýdy tunshyqtyrmaýy tıis» dep eskertip, jeńildetilgen qarjylandyrý men kópjaqty damý bankteri tarapynan nesıe múmkindikterin keńeıtýdiń mańyzyn atap ótti.

Forýmǵa Nıgerııa prezıdenti Bola Tınýbý, Ońtústik Afrıka prezıdenti Sırıl Ramafosa jáne Kenııa prezıdenti Ýılıam Rýto qatysty. Afrıkalyq kóshbasshylar óz sózderinde kómek júıesinen ınvestıtsııalyq áriptestikke kóshý qajettigin aıtty. Rýto Kenııanyń Toyota kompanııasymen 5 myń elektromobıl jetkizý boıynsha kelissózder júrgizip jatqanyn málimdedi.