Pavlodarlyq qutqarýshy MMA-dan Qazaqstan chempıony boldy
ASTANA. KAZINFORM — Pavlodar oblysy Tótenshe jaǵdaılar departamentiniń qyzmetkeri, «Batyr Team» klýbynyń tárbıelenýshisi Aıda Ablaeva Astanada ótken Qazaqstan chempıonatynda MMA-dan altyn medal jeńip aldy, dep habarlaıdy TJM baspasóz qyzmeti.
54 kelige deıingi salmaq dárejesinde Traditional bóliminde óner kórsetken Aıda jeńiske jetip, sheberligin dáleldedi.
1-7 qarasha aralyǵynda sportshy Qazaqstan namysyn Tbılısıde (Grýzııa) ótetin álem chempıonatynda qorǵaıdy. Ol 1-20 jas sanatynda 52,2 kelige deıingi salmaqta óner kórsetedi.
— Chempıonymyzdy maqtan tutamyz! Aıdaǵa jarqyn óner, qaısar jiger jáne halyqaralyq arenada jańa jeńister tileımiz! — delingen habarlamada.
Buǵan deıin TJM qyzmetkerleri qoıan-qoltyq urystan Álem kýbogynda 9 medal jeńip alǵanyn jazǵanbyz.
