Pavlodarlyq kitaphanashylar merekege oraı alty aılyq sábıge bazarlyq jasady
PAVLODAR. KAZINFORM - «Shańyraq kúninde» Toraıǵyrov atyndaǵy oblystyq kitaphana ujymy kishkene qyz Aıshaǵa úkili dombyra syılap, aq jaýlyqty ájeler bata berdi.
«Búgin – elimizde otbasylyq qundylyqtar dáripteletin kún. Ónegeli, ulaǵatty otbasylarǵa qurmet kórsetý maqsatynda óńirimizde kóptegen shara ótip jatyr. Bizdiń ujymymyzdaǵy qyzmetkerlerdiń otbasyndaǵy eń kishkentaı sábı áriptesimiz Alpysbaı Honjdyń bóbegi bolyp shyqty. Minekeı, kitaphana ujymy jınalyp, Aısha esimdi sábıge syılyq jasaýǵa keldik», - dep atap ótti Toraıǵyrov atyndaǵy oblystyq kitaphananyń kreatıvti shyǵarmashylyq ortalyǵynyń basshysy Maral Tajenova.
Kishkentaı Aıshaǵa qazaqtyń ulttyq aspaby – úkili dombyrany dástúrli ánshi, respýblıkalyq baıqaýlardyń júldegeri Ásel Botaeva tabystady. Al kitaphana salasynyń ardageri, aq jaýlyqty áje Hadısha Dándibaeva is-sharaǵa jınalǵandarǵa shashý shashyp, sábıge batasyn berdi.
Alty aılyq Aıshanyń ákesi Alpysbaı Honj – S.Baıazıtov atyndaǵy balalar oqý ortalyǵynyń basshysy, aqyn, satırık. Al anasy Gúlmereı mektepte sabaq beredi. Jas ári ónegeli otbasyndaǵy balalardyń úlkeni – ul. «Naýryz-bazarlyqqa» kenelgen shańyraq ıeleri kitaphanashylar ujymyna rızashylyqtaryn jetkizdi.
